Бусліная вуліца ёсць у Камарове

На вуліцы Міру ў вёсцы Камарова можна налічыць аж шэсць бусліных гнёздаў, якія размяшчаюцца не вельмі далёка адно ад другога. Па крайняй меры ні на адной з іншых вуліц населенага пункта іх столькі няма.

Жыхары расказваюць, што пастаянна на іх вуліцы селяцца буслы. Увесну прылятаюць, робяць гнёзды, выводзяць і гадуюць птушанят, а пад восень дружна сем’ямі збіраюцца ў гурт і адлятаюць у вырай.

Летась новая чарада птушак з’явілася ў вёсцы. Прычым летам, калі буслы, што гнездаваліся тут пастаянна, птушанят ужо вывелі. «Чужынцы» пасяліліся на вялікім дрэве каля будынка старой школы. Гнёздаў яны не рабілі. Днём хадзілі па палях у пошуках ежы. А ўвечары збіраліся разам на дрэве, каб пераначаваць. Казалі людзі, што хутчэй за ўсё птушкі прыляцелі з Украіны. Напэўна, ад вайны ў Беларусі хаваюцца…

А сёлетняй вясной нашмат больш буслоў прыляцела ў Камарова, чым звычайна. Хутчэй за ўсё вярнуліся на радзіму бацькі са сваімі дарослымі дзецьмі, якія тут выраслі. А магчыма хто і з «чужынцаў» вырашыў знайсці сабе тут прыстанак, аблюбаваўшы прыгожыя і ціхія навакольныя мясціны. Як бы там ні было, а бусліных гнёздаў сапраўды стала больш!

Цешыліся людзі, назіраючы, як дружна вясной буслы насілі галіны, каб упару змайстраваць гнёзды і паспець вывесці птушанят. Дзівіліся іх працавітасці, упартасці і настойлівасці. А калі бачылі, як моцны вецер і непагадзь перашкаджаюць птушкам ажыццявіць задуманае, засмучаліся, бо шкадавалі іх. Пры моцным ветры буслам і самім было цяжка падняцца ўвысь, а тым больш з галінамі дрэў у дзюбе і з іншым матэрыялам, прыдатным для будаўніцтва гнязда. Але руплівасць і мэтанакіраванасць дапамаглі птушкам усе выпрабаванні пераадолець. Праўда, гнёзды зноў аказаліся на слупах ліній электраперадач.

Цяпер, калі едзеш па вуліцы Міру, яшчэ можна ўбачыць птушанят, якія стаяць у гнёздах і махаюць крыламі, рыхтуючыся да свайго першага палёту. А некаторыя нават пад наглядам бацькоў ужо і лятаць пачынаюць.

Час хутка ідзе. Не агледзішся, як надыдзе пара і ў вырай адпраўляцца. Дарога гэта будзе доўгай і цяжкай. Вялізную адлегласць давядзецца буслам пераадолець, з рознымі перашкодамі справіцца, каб дабрацца да свайго канечнага прыпынку. А таму ўжо зараз ім трэба ў далёкі шлях рыхтавацца і сіл набірацца, асабліва маладым птушкам.

Кажуць, што буслы селяцца толькі каля добрых людзей. Напэўна, так і ёсць, раз прыгожыя птушкі выбралі месцам для свайго пражывання менавіта вуліцу Міру.

Марыя ЛУБНЕЎСКАЯ Фота аўтара