Оригинальные игрушки делает Татьяна Яночкина

Цікавая выстава экспануецца ў Крывіцкай пасялковай бібліятэцы.

– Шмат цікавых, таленавітых людзей жыве ў зоне абслугоўвання нашай бібліятэкі, – расказвае яе загадчык Ала Гурло. – У многіх ёсць розныя хобі: хто вырошчвае кветкі, хто вяжа пруткамі ці шыдэлкам, хто выразае па дрэве ці сталярнічае, хто вышывае ці працуе з саломкай, тканінай…

Зараз у бібліятэцы наладжана выстава работ жыхаркі пасёлка Таццяны Яначкінай. Таццяна Феліксаўна вяжа шыдэлкам лялькі. Гэта пераважна казачныя персанажы і героі мультфільмаў. Усе прыгожыя, адметныя і вельмі арыгінальныя. Глядзець на іх можна гадзінамі. І пры гэтым уяўляць, як героі сябе паводзяць, куды зараз накіруюць сваю энергію, што іх чакае наперадзе. Такое ўражанне, што гэта не цацкі, а жывыя істоты – са сваімі думкамі, пачуццямі. Настолькі тонка майстар здолела перадаць, раскрыць іх вобразы.

– Таццяна Феліксаўна ўвогуле вельмі творчая натура. За што б ні ўзялася – усё ў яе атрымліваецца прыгожа і якасна, – працягвае Ала Дзмітрыеўна. – З’яўляецца майстрам народнага клуба самадзейных майстроў «Крывічы», які працуе пры раённым цэнтры народных рамёстваў. Часта яе работы можна ўбачыць на розных святах і выставах. А яшчэ Таццяна Яначкіна перадае майстэрства дзецям, якія наведваюць цэнтр. Вучыць вязаць шыдэлкам, дае парады, дзеліцца багатым вопытам.

Марыя ЛУБНЕЎСКАЯ

Фота Алы ГУРЛО