Сусвет Аляксандра Быкава. У цэнтральнай раённай бібліятэцы адбылася вечарына да юбілею паэта

Сёння, 7 верасня, 70 гадоў споўнілася нашаму земляку – паэту і празаіку Аляксандру Быкаву. Якога на Мядзельшчыне добра ведаюць не толькі як аўтара вершаваных ды празаічных твораў, уладальніка літаратурнай прэміі “Залаты Купідон”. Але і як журналіста, што 30 год аддаў працы ў “Нарачанскай зары”. І як аматара бегу і ўдзельніка марафонаў.

Той жа, хто прыйшоў сёння на вечарыну-партэрэт “Сусвет Аляксандра Быкава” ў цэнтральную раённую бібліятэку імя Максіма Танка, меў магчымасць наноў адкрыць для сябе славутага земляка і яго творчасць. Пазнаёміцца з быкаўскім вершам, напісаным у вучнёўскім сшытку ў школьныя гады. Даведацца, за што будучы паэт атрымаў дзяржаўную ўзнагароду (не за вершы) . Як пазнаёміўся з будучай жонкай і што прывяло іх маладую сям’ю ў Мядзел. І з першых вуснаў пачуць, якія вершы з прысвечаных ёй найбольш падабаюцца жонцы паэта Таццяне Барысаўне.

Пра малавядомыя старонкі жыцця і творчасці Аляксандра Быкава расказала вядучая вечарыны, намеснік дырэктара бібліятэкі Ганна Падгол. А добрыя словы і падарункі віноўніку ўрачыстасці адрасавалі многія.

Першай вітала юбіляра колішняя аднакурсніца па журфаку БДУ, а зараз паэтка Ала Клемянок. Узнагароду Мінскага абласнога аддзялення Саюза пісьменнікаў Беларусі ўручыў намеснік старшыні гэтага аддзялення Рагнед Малахоўскі­ – таксама паэт і наш зямляк. Вітаў юбіляра сябар Юрый Малахоўскі.

Ад рэдакцыі “Нарачанскай зары” віншавала аўтарка гэтых радкоў, ад раённага савета ветэранаў – старшыня Уладзімір Валасевіч, ад цэнтральнай раённай бібліятэкі – дырэктар Таццяна Нырцова. Дзякавала за дапамогу ў рэдагаванні ўласных вершаў і чалавечнасць вядомы на Мядзельшчыне ўрач Іда Гумніц (сёлета на выдала паэтычны зборнік).

А кіраўнік гімназічнага аб’яднання па інтарэсах “Спробы пяра” Вікторыя Сяклюцкая расказала, што школьніцай паказвала Быкаву свае першыя літаратурныя спробы і атрымлівала прафесійныя парады.

Ну і, вядома ж, гучалі быкаўскія вершы – у аўтарскім выкананні і не толькі.

Падрабязней пра вечарыну – у газеце ў наступную суботу.

Наталля ЛІСІЦКАЯ
Фота і відэа Аляксандра ВЫСОЦКАГА