Ученицам Занарочской школы вручили паспорта в УВД Миноблисполкома

З нагоды Дня Канстытуцыі Рэспублікі Беларусь ва ўпраўленні ўнутраных спраў Мінаблвыканкама прайшла ўрачыстая цырымонія. На ёй уручылі пашпарты членам ваенна-патрыятычных клубаў, а супрацоўнікам абласной міліцыі – дзяржаўныя ўзнагароды.

– Дзякуючы ўзаемадзеянню і цеснаму супрацоўніцтву з Мядзельскім РАУС удзельнікамі мерапрыемства сталі члены ваенна-патрыятычнага клуба «Баявы» імя Мікалая Іванавіча Падшываленкі Мілана і Аліна Карповіч з Занарацкай сярэдняй школы, – паведаміла дырэктар навучальнай установы Вольга Лосік. – Галоўны дакумент дзяўчынкі атрымалі з рук начальніка УУС Мінаблвыканкама генерал-маёра міліцыі Аляксандра Астрэйкі. Аляксандр Вячаслававіч даў дзецям наказы і адзначыў, што членства ў ваенна-патрыятычным клубе – гэта важны крок у правільным накірунку і сённяшні дакумент надзяляе іх вельмі важнымі паўнамоцтвамі. Грамадзяне Беларусі і дзяржава будзе рабіць усё магчымае, каб жыццё было паспяховым, шчаслівым і развівалася так, як яны палічаць патрэбным. Ім жа ў сваю чаргу трэба быць сапраўднымі грамадзянамі і патрыётамі сваёй краіны, выконваючы законы. Завяршылася мерапрыемства памятным фатаграфаваннем і экскурсіяй у музей УУС Мінаблвыканкама. Дадому Мілана і Аліна вярнуліся са сваімі першымі пашпартамі, падарункамі і букетамі кветак. І самае важнае – з гонарам і павагай да сваёй квітнеючай краіны.

Фота УУС аблвыканкама