Зусім хутка — старт «зялёнага жніва» ў гаспадарках раёна. Надвор’е спрыяе росту траў, і ёсць усе падставы разлічваць на тое, што запас кармоў на зіму для грамадскага статка будзе важкім. Безумоўна, патрэбна пастарацца, бо работа на сенажацях заўсёды патрабуе немалога клопату, аператыўнасці. Упусціш спрыяльны час — шмат страціш.
Ва ўпраўленні райсельгасхарчу параілі наведацца ў СВК «Будслаўскі» — адну з гаспадарак, дзе, як кажуць, найбольш актыўна рупяцца ў гэтым напрамку. Пагутарыць па тэме вырашылі з маладым інжынерам гаспадаркі А. В. Катковічам. Бо з чаго пачынаць, калі не з гатоўнасці тэхнікі!
— «Зялёнае жніво» ў нас фактычна ўжо стартавала, — апярэдзіў Анатоль Валер’евіч. — З 15 мая косім на падкормку жывёле нашага комплексу. Дабаўляем у рацыён да сіласу і камбікармоў. На сенажаці шчыруе на «КЗР-10» Валерый Алесенка. Адвозіць масу яго бацька Яўген Вітальевіч. Пакуль аб’ёмы, зразумела, невялікія — па дзве машыны ў дзень дастаўляем на ферму.
— А як ідзе падрыхтоўка да масавага выхаду на сенажаці?
— Думаю, затрымкі не будзе. У гэтай рабоце дадаткова прыме ўдзел яшчэ пара «КЗР-10» (адзін будзе касіць напрамую, другі — у валок). Тэхніка падрыхтавана, у чым заслуга яе «гаспадароў»-механізатараў Івана Баркоўскага і Анатоля Аксючыца. У страі і касілка «Е-281» Казіміра Зімнохі. Патрабуецца дробязны рамонт двух комплексаў «Е-301». Думаю, што і тут паспеем, бо задзейнічаем іх крыху пазней — непасрэдна на нарыхтоўцы сена. Акрамя гэтага, будуць працаваць на сенажацях 4 прэс-падборшчыкі і двое грабель. Дарэчы, неўзабаве набудзем комплекс «КГ-6 «Палессе», які падключым затым да касьбы траў.
— Анатоль Валер’евіч, а хто будзе працаваць на трамбоўцы зялёнай масы? Ад гэтага, як вядома, у многім залежыць якасць корму.
— Гэту справу даручым механізатару Аляксандру Нікалаеву. Пакуль жа ён на сваім
«К-701» займаецца дыскаваннем глебы. Пачалі падрыхтоўку і саміх сянажных траншэй, марудзіць тут таксама нельга. Механізатараў увогуле ў нас хапае, так што з улікам наяўнай тэхнікі сезон нарыхтоўкі кармоў павінен скласціся ўдала.
Пагутарылі ў гэты дзень і з
В. Я. Алесенкам.
— Працуецца нармальна, — патлумачыў Валерый Яўгенавіч. — Травастой някепскі, тэхніка не падводзіць. Работы, праўда, яшчэ не так шмат, бо забяспечваю зялёнкай пакуль толькі пагалоўе комплексу. Але, як сказаў наш старшыня, літаральна з заўтрашняга дня тэмпы работ на сенажацях кааператыва павялічацца, бо трэба дастаўляць яе і на іншыя фермы. Будзем паступова набіраць абароты, каб грамадскі статак гаспадаркі меў паўнацэнны рацыён.
Аляксандр БЫКАЎ.
На здымку: механізатар В. Я. Алесенка.
Фота Ігната Лубнеўскага.