Мінулай суботай каля 9 гадзін раніцы сустрэў знаёмага мядзяльчаніна, які ў гэты час ужо вяртаўся дадому з гарадскога рынку.
— Чаму ж вы крочыце з пустымі рукамі? — спытаў.
— Хацеў набыць бульбачкі і ячменю для курак, ды не прывезлі пакуль нічога з гаспадарак…
Сапраўды, кірмаш, што абяцаўся быць значна багацейшым за папярэдні, уражанне пакінуў далёка не лепшае. Бульбу ў гэты дзень прывезлі адны будслаўчане. Папулярную «журавінку» гараджане зноў разабралі літаральна за паўгадзіны. Астатнія дарэмна чакалі прыбыцця дадатковых машын, у тым ліку, і з мясной прадукцыяй. А павінны былі, у прыватнасці, даставіць свініну з ААТ «Мядзельскае аграпрамэнерга», ялавічыну —
з СВК «Лук’янавічы». Не падвялі толькі слабадчане, якія другі раз ужо прывезлі збожжа. Праўда, цяпер не ячмень, а трыцікале. Але жадаючых яго набыць, як можна здагадацца, аказалася значна больш…
У нейкай ступені выручыла мядзяльчан нарыхтоўчая кантора. Шчасліўчыкам дасталася капуста (белакачанную закуплялі ў насельніцтва), была ў продажы і бульба, таксама буракі, цыбуля, яблыкі. А непадалёку выстраілася чарга за свежай рыбай: нарасхват ішлі апетытныя карпы, таўсталобікі, карасі.
— Адкуль рыба? — пытаюся ў прадаўца.
— З Нясвіжа…
Яно няхай і адтуль. Але міжволі падумалася: «А дзе ж прадукцыя вадаёмаў (зусім не бедных!) нашага Нарачанскага краю?».
А вось вытворцы УП «Ілаўскае» не паленаваліся адправіцца ў Мядзел. У іх аўтафургоне аказаўся даволі шырокі асартымент вырабаў. У прыватнасці, сокі, варэнне, павідла, чыпсы. І ўсё — з натуральных, як кажуць, інгрэдыентаў.
Асобныя, каб задаволіць свой імпэт, спыняліся каля ларка з шыльдай «Бяспройгрышная латарэя». Канечне, хапала там усялякай драбязы, асабліва пацешыць цікавасць дзяцей. Ды ў большасці, як вядома, людзі прыйшлі на кірмаш, каб прыдбаць нешта да стала, на зіму назапасіцца. Наколькі ім гэта ўдалося, самі разважце.
Добра, што самадзейныя артысты наладзілі канцэрт на імправізаванай пляцоўцы. А завіталі яны на кірмаш з Лотвы, Старых Габаў, Заняў і Слабады, а таксама Старамядзельскага Дома вольнага часу. Вясёлымі песнямі і жартамі выканаўцы пастараліся ўзняць настрой тым, хто вырашыў спыніцца, каб іх паслухаць.
Застаецца дадаць, што таксама ў мінулую суботу ў курортным пасёлку Нарач гандляваў бульбай СВК «Міжазёрны край», а СВК «Зані» — ялавічынай, СК «Брусы» — свінінай.
Аляксандр БЫКАЎ.
На здымках: 1. Прапануе прадукцыю нарыхтоўчая кантора; 2. Са смачнымі чыпсамі вытворчасці УП «Ілаўскае» Аня Чарняўская і Ксенія Малевіч; 3. Самадзейныя артысты Мядзельшчыны перад выхадам на сцэну.
Фота Таццяны Несцярэнка.