У 47-ы раз студэнты і выкладчыкі Беларускага дзяржаўнага педагагічнага ўніверсітэта імя М. Танка здзейснілі «зорны паход». Мэта мерапрыемства — знаёмства з цікавымі і знакамітымі мясцінамі роднай Беларусі, з падзеямі, якія маюць важнае гістарычнае значэнне, у тым ліку перыяду Вялікай Айчыннай вайны. Адбываюцца таксама сустрэчы са старшакласнікамі з розных рэгіёнаў рэспублікі. Як правіла, падчас такіх спатканняў удзяляецца ўвага прафарыентацыйнай рабоце, ідзе аповед пра спецыяльнасці, якія можна атрымаць у адной са старэйшых ВНУ краіны. Адметным з’яўляецца і тое, што ўчарашнія вучні, а сёння студэнты, расказваюць пра змястоўнае жыццё ў сценах педуніверсітэта і тым самым ствараюць яму добрую рэкламу і заахвочваюць выпускнікоў набываць прафесію настаўніка, папулярнасць якой, на жаль, змяншаецца.
Не абмінулі прадстаўнікі БДПУ і Мядзельшчыну — радзіму вядомага ў свеце песняра, чыё імя з гонарам носіць педуніверсітэт і стагоддзе з дня нараджэння якога будзе шырока адзначацца ў верасні бягучага года. А таму канцэртная праграма, якая дэманстравалася ў шэрагу школ Нарачанскага краю, прысвячалася жыццёваму і творчаму шляху Максіма Танка (Яўгена Іванавіча Скурко).
Мне пашчасціла папрысутнічаць на мерапрыемстве, якое праводзілася ў Мядзельскай СШ імя У. М. Дубоўкі. Ніколькі не пакрыўлю душой, калі адзначу, што спадабалася практычна ўсё, пачынаючы з выхаду на сцэну вядучых і заканчваючы сумеснай песняй у выкананні ўсіх удзельнікаў канцэрта. З дапамогай пранікнёных вершаваных радкоў і прозы самадзейныя артысты са сталіцы паспрабавалі паказаць, якім быў пры жыцці Максім Танк, як горача любіў сваю маленькую радзіму — край Нарачанскі, беларускі народ. Гэтыя тэмы, дарэчы, дамінавалі і ў яго творчасці. Чытальнікаў змянялі танцоры, спевакі… Сваім моцным, прыгожым ад прыроды голасам зачараваў усіх прысутных Аляксандр Юдзінец. Хораша спявалі дуэтам дзяўчаты Вольга Цімошчык і Юлія Амельяновіч. На «ўра» было ўспрынята выступленне і прадстаўнікоў знакамітай каманды КВЗ педуніверсітэта.
Затым канцэртная праграма плаўна перайшла ў другую частку мерапрыемства, падчас якой адбылася своеасаблівая прэзентацыя навучальнай установы. Першым меў слова намеснік дэкана гістарычнага факультэта А. У. Канойка. Аляксандр Уладзіміравіч, у прыватнасці, адзначыў, што ва ўніверсітэце працуюць высокакваліфікаваныя выкладчыкі. Толькі 19 дактароў навук падрыхтавана за яго існаванне. Нагадаў ён таксама пра спецыяльнасці, якія можна атрымаць на факультэце за час навучання. Дапоўнілі яго студэнты трэцяга і чацвёртага курсаў Аляксандр Юдзінец і Павел Шыманскі. Першы з іх узначальвае студэнцкі савет факультэта, другі — актыўна ўдзельнічае ў КВЗ, а таму яны не на слых ведаюць, што менавіта гады вучобы ў ВНУ — самыя цікавыя і незабыўныя. Выступіла і дацэнт кафедры агульнага мовазнаўства факультэта беларускай і рускай філалогіі А. С. Рускіх. Анастасія Сяргееўна расказала пра параўнальна малады факультэт (існуе толькі два гады), які прадстаўляе, пра ўмовы навучання і спецыяльнасці, якія там можна атрымаць. Цікавым быў аповед і ў студэнткі чацвёртага курса, старшыні студэнцкага савета названага факультэта Кацярыны Цябут. Выдатным працягам пачутага стаў фільм пра жыццё і будні студэнтаў адной са старэйшых навучальных устаноў краіны.
Закончылася мерапрыемства паказам літаратурна-музычнай кампазіцыі, прысвечанай стагоддзю з дня нараджэння народнага паэта Беларусі Максіма Танка, якую пад кіраўніцтвам настаўнікаў беларускай мовы і літаратуры Элы Іванаўны Казельскай і Марыны Міхайлаўны Галаенка падрыхтавалі вучні 10 і 11 класаў СШ №1 горада. Аўтар тэкста прэзентацыі «Гартаючы старонкі яго жыцця» — настаўніца беларускай мовы і літаратуры гэтай жа навучальнай установы Антаніна Пятроўна Штура. Са сцэны на фоне музыкі вёўся расказ пра асноўныя эпізоды жыцця вядомага беларускага песняра, пачынаючы ад нараджэння і да смерці, пра яго бацькоў, сям’ю і, вядома ж, пра творчасць, дзе чырвонай ніткай праходзіла тэма любові да Радзімы, дарагога сэрцу Нарачанскага краю. Краналі душу прысутных і палымяныя радкі вершаў нашага знакамітага земляка, якія чыталі вучні са сцэны. Падвяла вынік змястоўнай размовы, якая адбылася, настаўніца беларускай мовы і літаратуры Э. І. Казельская. Эла Іванаўна падзякавала гасцям, што прыехалі ўшанаваць памяць паэта, для якога не на словах, а на справе хлебам надзённым застаўся непакой за лёс роднай Зямлі. І пры гэтым дадала: «А нам толькі неабходна спрыяць, каб яго імя ніколі не сцерла імгла забыцця!».
Засталося дадаць, што затым студэнты БДПУ разышліся па класах, дзе правялі майстар-класы. З камандай Клуба Вясёлых і Знаходлівых школы сустрэліся КВЗшнікі педуніверсітэта. Пазнаёміліся госці са сталіцы з музеем СШ №1. Наведалі яны ў той дзень і Мядзельскі музей Народнай славы. А літаральна назаўтра пабывалі ў Пількаўшчыне — на радзіме Максіма Танка, завіталі па дарозе таксама на вясковы могільнік у Новікі, дзе пахаваны пясняр і яго жонка.
Марыя ЛУБНЕЎСКАЯ.
На здымку: удзельнікі «зорнага пахода».
Фота Таццяны Несцярэнка.