У дзяцей, якія завіталі ў апошні летні дзень на плошчу Шаранговіча ў Мядзеле, вочы проста разбягаліся. Тут было столькі забаў: разнастайныя гульнявыя пляцоўкі, вялізныя надзіманыя горкі, дзіцячае кафэ са смачным марожаным, салодкія пачастункі… Гэта праходзіла свята «Вітаем, школьная пара!».
Сабраліся ў цэнтры Мядзела дзеці розных узростаў. У адной з удзельніц — вучаніцы гімназіі-інтэрната Насці Хацяновіч — запытаў:
— Як для цябе прайшло лета?
— Першыя два тыдні рыхтавалася да экзаменаў. Потым адпачывала ад іх, хадзіла на возера. У ліпені ездзіла ў санаторый у Друскенінкай, правяла там 25 дзён. Паехалі тры чалавекі з Мядзельскага раёна. Было вельмі весела, шмат сяброў займела, ды і працэдуры патрэбныя прыняла. У жніўні працавала два тыдні ў Мядзельскай ЖКГ. Аздаравілася, набралася эмоцый і з добрым настроем іду на вучобу.
І вось пачынаецца афіцыйная частка свята. Пасля ўступных слоў вядучай Галіны Красоўскай з прывітальным словам да бацькоў, настаўнікаў і дзяцей звярнулася намеснік старшыні райвыканкама Іна Іванаўна Барыева:
— Жадаю ўсяго самага найлепшага, здароўя, шчасця, поспехаў, хай спаўняюцца ўсе вашы запаветныя мары. Але памятайце, што толькі ў казках жаданні выконваюцца па ўзмаху чароўнай палачкі, а ў жыцці лепшы чараўнік — ваша штодзённая праца. Таму жадаю не ленавацца, працаваць, дасканала вывучаць прадметы, якія прапануе школьная праграма.
Павіншавала дзяцей настаўніца Мядзельскай СШ №1 Галіна Аляксееўна Сёмка. Дзеці прадэманстравалі ўзо-
ры школьнай моды. Потым падвялі вынікі акцыі «Дапамажы сабрацца ў школу». Намеснік начальніка аддзела адукацыі Т. Г. Ефімава адзначыла, што актыўнымі ўдзельнікамі гэтай акцыі былі як жыхары горада, так і грамадскія арганізацыі, прадпрыемствы. Уручыла Таццяна Генадзьеўна падзячныя лісты аддзела адукацыі тым, хто вызначыўся ў акцыі — Р. Я. Цімкавіч, І. І. Навумчык, Н. М. Івашка, Марыі Яцына, Анастасіі Лагутка.
Летам дзеці не толькі адпачывалі, але і працавалі. Пра гэта нагадалі прадстаўнікі райкама БРСМ і аддзела па справах моладзі і ўзнагародзілі актыўных удзельнікаў студэнцкіх атрадаў і працоўных аб’яднанняў школьнікаў. А менавіта Наталлю Бажэлка, Маю Петнічэнка, Анастасію Гушча, Яўгенію Качарго, Анжаліку Якубовіч, Уладзіслава Дземашкевіча (будзе перададзены падарунак і Віталю Кішчыцу).
Вучні Мядзельскай СШ №1 Уладзіслаў Хліманкоў, Ілья Субач, Міхаіл Атрошка таксама апынуліся ў ліку ўзнагароджаных.
— Што ж вы рабілі летам? — пацікавіўся ў іх.
— Працавалі ў атрадзе пры ПМС, у Лук’янавічах. Цэмент кідалі, асфальт клалі ды іншае — тое, што рабілі астатнія рабочыя.
Тым часам бацькі маглі задаць пытанні кіраўніцтву аддзела адукацыі, навучальных і пазашкольных устаноў — працаваў «адкрыты мікрафон». А найчасцей давялося адказваць дырэктару Мядзельскага міжшкольнага вучэбнага вытворчага камбіната Наталлі Міхайлаўне Гірынай.
Цікавасць у юных модніц выклікаў майстар-клас па дзіцячых прычосках. Паказвалі майстэрства не толькі мядзельскія цырульніцы, прыехалі майстрыхі з Вілейскага дзяржаўнага прафесійна-тэхнічнага каледжа.
— Тут двое дарослых і дзве навучэнкі, — расказала майстар вытворчага навучання каледжа Вольга Леанідаўна Каркоцкая. — Думаю, юным мядзяльчанкам цікава — вунь і чарга ўжо выстраілася.
Гэтак жа нямала жадаючых было праверыць свае здольнасці ў турыстычных навыках на пляцоўцы «Рабінзанада». Яшчэ дзеці з задавальненнем спявалі ў караоке-клубе, удзельнічалі ў вясёлых спаборніцтвах на гульнявых пляцоўках, гарталі кнігі на «Літаратурнай паляне». Майстар-класы правялі кіраўнікі гурткоў Цэнтра творчасці дзяцей і моладзі, можна было больш даведацца пра названую установу. Запрашаў у свае гурткі таксама гарадскі Дом культуры. А быў яшчэ і святочны канцэрт з удзелам выхаванцаў дзіцячай школы мастацтваў і аддзела культуры, і дыскатэкі, і дэманстрацыя мультфільмаў — словам, напрыканцы канікулаў атрымалася сапраўднае свята для дзяцей.
Аляксандр ВЫСОЦКІ.
Фота аўтара.
Як мы рыхтаваліся?
На пытанне адказвае Наталля Міхайлаўна Анішкевіч:
— Наш сын Ігар пойдзе ў другі клас. Да новага навучальнага года пачалі рыхтавацца з пачатку жніўня. Рэчы набывалі ў Мінску, у ЦУМе. Да іх выбару падышлі адказна — куплялі беларускае. Як і сярод адзення, абутку, так і канцылярскіх прыладаў аддалі перавагу якаснаму тавару. Упэўнена, што ў выбраных намі рэчах сын будзе адчуваць сябе зручна і камфортна. А гэта, вядома, паспрыяе стараннай вучобе. Мы задаволены сваім выбарам, а галоўнае, што дзіця з вялікім задавальненнем і настроем ідзе ў школу. А нам, бацькам, бачыць радасныя вочы і добрыя адзнакі ў дзённіку — сапраўднае шчасце.
Наш кар.