У мінулую сераду, 24 жніўня, у зале пасяджэнняў райвыканкама прайшла традыцыйная нарада настаўнікаў. Яе тэма: » Прафесіяналізм і прадпрыемлівасць педагогаў — асноўны механізм рэалізацыі інавацыйных напрамкаў развіцця адукацыі раёна». У чарговы раз напярэдадні новага навучальнага года сабраліся разам прадстаўнікі школ, дашкольных і пазашкольных дзіцячых устаноў, ветэраны педагагічнай працы, каб абмеркаваць вынікі работы, нявырашаныя праблемы, вызначыць стратэгічныя і задачы на бліжэйшы час. У рабоце жнівеньскай педагагічнай канферэнцыі прынялі ўдзел: старшыні раённага Савета дэпутатаў А. А. Бароўка, Мінскага абласнога камітэта прыродных рэсурсаў і аховы навакольнага асяроддзя Л. У. Шахлевіч, Мінскай абласной і раённай арганізацый Беларускага прафсаюза работнікаў адукацыі і навукі М. М. Башко і І. В. Глінская, галоўны спецыяліст упраўлення адукацыі Мінскага абласнога выканаўчага камітэта А. Г. Жучэнка.
Напачатку вядучыя — настаўнікі Мядзельскай САШ №1 імя У. М. Дубоўкі А. В. Паршута і Нарацкай САШ №2 В. Ф. Радзевіч — шчыра прывіталі прысутных з пачаткам новага навучальнага года і пазнаёмілі іх з гасцямі, запрошанымі на свята. Прыемна было бачыць сярод іх ветэранаў педагагічнай працы — былых загадчыка раённага аддзела адукацыі І. І. Якімца, старшыню райкама прафсаюза работнікаў адукацыі і навукі Г. І. Варабей, дырэктараў Крывіцкай і Сваткаўскай сярэдніх школ Э. К. Дубаневіч і З. І. Лубешка, настаўнікаў Свірскай і Нарацкай №1 сярэдніх школ Т. І. Балаш (заслужанага настаўніка БССР) і Г. І. Кішко. Усе яны ў свой час унеслі значны ўклад у развіццё сферы адукацыі раёна.
Канферэнцыя аб’яўляецца адкрытай. Гучыць Дзяржаўны гімн Рэспублікі Беларусь. Затым пачынаецца адзін з самых урачыстых момантаў — ушанаванне маладых спецыялістаў. Чатырнаццаць выпускнікоў вышэйшых і сярэдніх навучальных устаноў сёлета папаўняюць дружную сям’ю педагогаў азёрнага краю. У тым ліку А. У. Быцко, А. А. Валасевіч, В. С. Голуб, А. В. Грынкевіч, К. В. Кодзь, В. Ф. Кавалёў, А. М. Марэцкая, Я. А. Сёмка, Т. А. Харэвіч, В. М. Шавель, Н. М. Чэпукова, Э. В. Бадалян… Прывітаць сваіх маладых калег вядучыя запрашаюць педагогаў, якія летась самі выступалі ў гэтай ролі. Парады, дадзеныя імі ў жартаўлівай форме, безумоўна, дапамогуць пачынаючым самастойную працу настаўнікам праявіць сябе, паказаць на што вартыя. Са словам у адказ выступіла выпускніца Беларускага дзяржаўнага педагагічнага ўніверсітэта імя М. Танка, а зараз настаўніца фізікі і матэматыкі ДУА «Крывіцкі вучэбна-педагагічны комплекс дзіцячы сад-САШ» А. А. Валасевіч. Малады спецыяліст выказала ўдзячнасць бацькам — за падтрымку і парады, настаўнікам — за бясцэнныя веды, мудрасць і добры прыклад ва ўсім. Прагучала з вуснаў Алены Аляксандраўны і абяцанне — прысвяціць сябе выхаванню дастойных грамадзян Беларусі, з гонарам насіць высокае і ганаровае званне настаўніка.
Да мікрафона запрашаецца старшыня раённага Савета дэпутатаў А. А. Бароўка.
— Педагогі заўсёды актыўна працавалі над вырашэннем пастаўленых грамадствам задач, — гаворыць Алег Алегавіч. — Галоўная з іх сёння — падрыхтоўка дастойных грамадзян незалежнай Беларусі. Нашы школьнікі дабіваюцца адпаведных вынікаў у інтэлектуальнай, навукова-даследчай дзейнасці, спорце… За ўсім гэтым — паўсядзённая, самаахвярная праца настаўнікаў, іх уменне спалучаць наватарства і гадамі накопленыя лепшыя традыцыі. Школа не толькі дае веды, займаецца выхаваннем сваіх вучняў. Незаменная яе роля ў барацьбе за лёс дзяцей з неблаганадзейных сем’яў, за зніжэнне падлеткавай злачыннасці…
Прамоўца павіншаваў прысутных з надыходзячым Днём ведаў, пажадаў здароўя, дабрабыту, поспехаў і творчых знаходак. А маладым спецыялістам — самаадданасці і аптымізму, уласцівых педагогам усіх пакаленняў, і не расчаравацца ў выбары сваёй прафесіі.
Слова для даклада прадастаўляецца начальніку раённага аддзела адукацыі І. В. Рагоўскай.
— Кіраванне якасцю адукацыі ў раёне ажыццяўляецца праз рэалізацыю мэтавых праграм развіцця дашкольнай, агульнай сярэдняй адукацыі, праграм выхаваўчай накіраванасці на аснове ўзаемадзеяння ўсіх удзельнікаў навучальнага працэсу, з улікам аналізу і самааналізу вынікаў дзейнасці, — адзначае Ірына Валянцінаўна. — Сумеснымі намаганнямі аддзела і ўстаноў адукацыі ў мінулым навучальным годзе ўдалося змадэліраваць дыферэнцыраваны адукацыйны кампанент, аснову якога складаюць факультатыўныя заняткі, якімі ахоплена да 91% школьнікаў. З мэтай павышэння якасці ўдзелу вучняў у алімпіядным руху, навукова-даследчай дзейнасці, інтэлектуальных конкурсах ажыццяўляецца павышэнне кваліфікацыі педагогаў на мэтавай і платнай аснове. Адпаведныя вынікі мае работа з адоранымі і таленавітымі школьнікамі. З трэцяга этапу рэспубліканскай алімпіяды па вучэбных прадметах каманда раёна ўдастоена 9 дыпломаў: 1 — першай, 3 — другой і 5 — трэцяй ступеняў. Пераможцай заключнага этапу рэспубліканскай алімпіяды па беларускай мове і літаратуры стала навучэнка гімназіі №1 г. Мядзел Юлія Грышкевіч. Даследчая дзейнасць па хіміі навучэнца гімназіі №1 г. Мядзел Максіма Вяруціна адзначана на рэспубліканскай навукова-практычнай канферэнцыі дыпломам трэцяй ступені, а па экалогіі вучня Нарацкай САШ №2 Філіпа Путра — дыпломам другой ступені на абласным і трэцяй — на рэспубліканскім конкурсе навуковых эколага-біялагічных работ. Каманда «Матрыкс» гімназіі №1 г. Мядзел па выніках рэгулярнага чэмпіянату Мінскай вобласці па інтэлектуальных гульнях сярод школьнікаў заняла трэцяе месца. Лаўрэатам Міжнароднага конкурсу, прысвечанага Дню бежанца «Мы роўныя — мы розныя», стаў вучань Будслаўскай САШ імя П. Мядзёлкі Арцём Федарук.
Паспяховая падрыхтоўка школьнікаў — выніковасць працы настаўнікаў беларускай мовы і літаратуры В. І. Грыбовіч, рускай мовы і літаратуры Л. А. Цяляк, замежнай мовы Л. М. Анішкевіч, фізікі Р. І. Балюк, хіміі Н. А. Клімовіч з гімназіі №1 г. Мядзел, біялогіі А. М. Раманьковай, гісторыі В. Ф. Радзевіча, геаграфіі
Т. У. Пракоп з Нарацкай САШ №2, біялогіі САШ №2 г. Мядзел С. Л. Варановіч, працоўнага навучання Мядзельскай САШ імя У. М. Дубоўкі А. М. Бажэлка, замежнай мовы Нарацкай САШ №1 І. І. Працко, беларускай мовы і літаратуры Будслаўскай САШ імя П. Мядзёлкі Я. В. Дземідовіч.
Дакладчыца спынілася на асноўных накірунках развіцця дашкольнай адукацыі ў сучасных умовах, на ролі кадравага патэнцыялу і ўдзеле педагогаў у конкурсах прафесійнага майстэрства, дзе таксама ёсць пэўныя поспехі. Упершыню ў гісторыі адукацыі азёрнага краю мядзяльчанка А. В. Колтан стала лаўрэатам абласнога этапу конкурсу «Настаўнік года Рэспублікі Беларусь-2011» , уладальніцай спецыяльнага прыза «Хрустальны бусел» за лепшы ўрок у незнаёмым класе і будзе прадстаўляць Міншчыну на рэспубліцы. Разам са сваімі вучнямі актыўна ўдзельнічаюць у міжнародных адукацыйных праектах настаўнікі замежнай мовы Нарацкай САШ №2 В. С. Шпакоўская і гімназіі №1 г. Мядзел
Л. М. Анішкевіч, гісторыі Сваткаўскай САШ імя М. Танка В. П. Ільюковіч і Старагабскага ВПК дзіцячы сад-САШ У. С. Серадзінскі.
Толькі наперад — да новых вышынь!
Асобна вялася размова наконт работы па фарміраванні ў дзяцей навыкаў здаровага ладу жыцця, грамадзянска-патрыятычных якасцей, у тым ліку праз дзейнасць грамадскіх фарміраванняў, праз стварэнне неабходных умоў для сацыялізацыі вучняў, удзел педкалектываў у рэалізацыі праграмы «Комплексная інфарматызацыя сістэмы адукацыі Рэспублікі Беларусь на 2007-2010 гады». Закраналіся і многія іншыя пытанні, якія датычаць гэтай сферы. Прагучалі назвы ўстаноў адукацыі і прозвішчы кіраўнікоў, якія праяўляюць лідарскія якасці, выдатныя арганізатарскія здольнасці. Сярод іх Г. В. Крыштафовіча (Нарацкая САШ №2), Л. А. Бурай (Дашкольны цэнтр развіцця дзіцяці к. п. Нарач), В. П. Клімовіча (гімназія №1 г. Мядзел), Т. В. Урбановіч (Камароўская САШ), Н. М. Гірынай (Мядзельскі міжшкольны ВВК». Дзелавітасць, знаходлівасць, ініцыятыўнасць уласцівы таксама Т. В. Таразевіч (Нарацкая САШ №1), Л. М. Арэхавай (Сырмежскі ВПК дзіцячы сад-САШ»), З. Э. Вайцяховіч (Слабодская САШ імя А. Гурыновіча), А. С. Марчанка (Свірская САШ), Г. М. Місун (Княгінінская САШ), М. В. Грыгаровіч (дзіцячы сад №8 г. п. Свір), Н. М. Лукашэвіч (яслі-сад №3 г. Мядзел).
Цудоўным дапаўненнем да даклада сталі выступленні педагогаў, якія вызначыліся ў год прадпрыемніцтва. Першай слова мела дырэктар Нарацкай САШ №1 Т. В. Таразевіч, якая спынілася на працоўных здабытках свайго калектыву ў арганізацыі вучэбна-выхаваўчага працэсу. Настаўнік гімназіі №1 г. Мядзел Н. А. Клімовіч расказала пра сістэму работы з адоранымі вучнямі. А педагог пачатковых класаў Нарацкай САШ №2 А. А. Бурко — пра выкарыстанне на ўроках і пазакласных мерапрыемствах сучасных інфармацыйна-камунікацыйных тэхналогій. Даволі цікавым, эмацыянальным было выступленне і вучня гэтай жа навучальнай установы Канстанціна Каратышэўскага — агульнапрызнанага лідара, мастака, актыўнага ўдзельніка маладзёжных форумаў. А паведаміў ён пра ўмовы, якія садзейнічаюць у іх школе самарэалізацыі вучняў.
У сваім прывітальным слове высокую ацэнку дзейнасці ўстаноў адукацыі Мядзельшчыны даў старшыня Мінскай абласной арганізацыі Беларускага прафсаюза работнікаў адукацыі і навукі М. М. Башко. Адно са складаемых поспеху педагогаў азёрнага краю, па яго меркаванні, — адладжаная сістэма сацыяльнага партнёрства, якая дапаможа, безумоўна, і ў вырашэнні новых задач, узнікаючых у сувязі з уступленнем у сілу з 1 верасня бягучага года кодэкса Рэспублікі Беларусь «Аб адукацыі». Мікалай Мікалаевіч уручыў таксама настаўніцкаму корпусу Мядзельшчыны ўзнагароды. Граматы Міністэрства адукацыі Рэспублікі Беларусь атрымалі дырэктар Нарацкай САШ №2 Г. В. Крыштафовіч, настаўніца хіміі гімназіі №1 г. Мядзел Н. А. Клімовіч і загадчыца Дашкольнага цэнтра развіцця дзіцяці Л. А. Бурая. Дарэчы, Людміла Аркадзьеўна атрымала таксама грамату абласной арганізацыі Беларускага прафсаюза работнікаў адукацыі і навукі. Акрамя яе, такой узнагароды былі ўдастоены яшчэ 9 педагогаў. Гэта ў асноўным старшыні пярвічных прафсаюзных арганізацый.
Наступны прамоўца — галоўны спецыяліст упраўлення адукацыі Мінскага аблвыканкама А. Г. Жучэнка. Алена Генадзьеўна, у прыватнасці, спынілася на задачах, якія стаяць перад настаўнікамі рэспублікі, у тым ліку і Мядзельшчыны, на сучасным этапе. Шаноўная госця пажадала прысутным здароўя, шчасця, дабрабыту, а самае галоўнае, каб іх душы і сэрцы ніколі не адчувалі стомленасці, заставаліся актыўнымі, апантанымі. Яна ж уручыла дырэктару Яцкавіцкай базавай агульнаадукацыйнай школы
В. А. Ананіч Ганаровую грамату ўпраўлення адукацыі Мінскага аблвыканкама. Атрымала Валянціна Аляксееўна за шматгадовую плённую працу на пасадзе дырэктара названай установы і грамату Мінскага абласнога камітэта прафсаюза работнікаў адукацыі і навукі. Акрамя таго, многія настаўнікі азёрнага краю былі заахвочаны граматамі ўпраўлення адукацыі Мінаблвыканкама, асобныя атрымалі падзякі начальніка названага ўпраўлення. У сваю чаргу, А. А. Бароўка ўручыў шэрагу настаўнікаў граматы раённага выканаўчага камітэта і падзякі старшыні райвыканкама. Граматы, у прыватнасці, атрымалі: дырэктар САШ №2 г. Мядзел С. М. Карабейнік, намеснік дырэктара Пузыроўскага ВПК дзіцячы сад-САШ З. А. Юркевіч, настаўнікі Сваткаўскай САШ В. П. Ільюковіч, Старагабскага ВПК дзіцячы сад-САШ У. С. Серадзінскі, Мядзельскай САШ №1 імя У. М. Дубоўкі А. М. Бажэлка і А. В. Паршута, Сырмежскага ВПК дзіцячы сад-САШ А. А. Пляшак, намеснік дырэктара Камароўскай САШ Г. І. Клюкоўская. Пяці чалавекам былі ўручаны падзякі старшыні райвыканкама.
Напрыканцы нарады яе ўдзельнікі прынялі праект рэзалюцыі, накіраваны на паспяховае вырашэнне задач, якія стаяць перад педагагічнай грамадскасцю на перспектыву і бліжэйшы час. Закончылася ўрачыстасць святочным канцэртам, падрыхтаваным юнымі талентамі, якія адпачываюць у НДЦ «Зубраня».
Марыя ЛУБНЕЎСКАЯ.
Фота Таццяны Несцярэнка.