Пад такой назвай прайшло ў Мядзельскай сярэдняй школе №1 імя У. М. Дубоўкі фальклорнае свята. Рыхтаваліся да яго вучні 9 «Б» класа разам з настаўніцай беларускай мовы і літаратуры В. У. Ермаковіч загадзя. Напачатку юнакі і дзяўчаты выпытвалі ў сваіх бабуль і дзядуляў, а таксама прабабуль і прадзядуляў пра тое, як яны некалі праводзілі свой вольны час, у якія гульні гулялі, якімі рамёствамі займаліся, што рабілі на вячорках. Адпаведную інфармацыю адшуквалі таксама ў інтэрнэце, розных літаратурных выданнях. Пасля ўсе сабраныя звесткі пад кіраўніцтвам педагога абагульнялі, групавалі, каб атрымаць больш поўнае ўяўленне пра тагачаснае жыццё і звычаі сялян. Многія старшакласнікі прыносілі з дому рэчы, якія маглі далучыць іх да культурнай спадчыны мінулай пары.
І вось нарэшце ўсё гатова. Памяшканне стылізавана пад беларускую хату. На покуці вісяць абразы, упрыгожаныя ручнікамі. Ля ўваходу знаходзіцца печ. На сценах развешаны тканыя посцілкі, вышыванкі, ручнікі. На стале, на падлозе стаяць рэчы хатняга ўжытку: дзяжа, бойка, прасніца, калаўрот, качалка, кашы, збаны, гарлачы, лапці, вырабы з саломкі… Дзеці і госці, а гэта настаўнікі беларускай мовы і літаратуры навучальных устаноў Мядзельшчыны, рассаджваюцца за сталом. Гучаць словы песні Ю. Семянякі і У. Карызны «Люблю цябе, Белая Русь», якія змяняюць радкі верша Р. Барадуліна «Матчына хата». І пачынаецца цікавае падарожжа па краіне нашых продкаў. А бярэ яно свой адлік з вясковай сядзібы, якая ўяўляе сабой спадчыну: і зробленую рукамі чалавека, і духоўную, што прыйшла з мінулага ў дзень сённяшні і якую трэба зберагчы для нашчадкаў.
— Родны куточак, бацькоўская хата,
Колькі там ласкі, дабра, чысціні!
Маці з парога дзяцей сустракае,
Мрояцца думкі аб гэтым у сны, —
чытае Валянціна Уладзіміраўна. Педагога дапаўняюць вучні, якія знаёмяць прысутных з асаблівасцямі інтэр’ера сялянскай хаты і рэчамі, якія знаходзяцца ў ёй. Пачынаецца аповед з прызначэння печы, да якой здаўна адносіліся як да жывой істоты і ў прысутнасці якой нават не ўжывалі грубыя, непрыстойныя словы. Да яе дакраналіся, каб «быў лад», калі ехалі да дзяўчыны ў сваты, у яе прасілі дапамогі і ў доме будучай нявесты. І гэта невыпадкова, бо падпечак лічыўся месцам знаходжання добрага духа — дамавіка, галоўным абавязкам якога быў клопат пра дабрабыт сям’і.
Не менш важнае значэнне надавалася здаўна і парогу. Меркавалі, што там жылі душы продкаў, якія маглі паўплываць на здароўе, заможнасць, узаемаадносіны з людзьмі. Нездарма, адпраўляючыся ў далёкую дарогу, садзіліся перад парогам, каб не наклікаць спрэчак, непаразумення. Забаранялася вітацца праз парог. Нельга было і на яго станавіцца.
Ганаровым месцам лічыўся і покуць. Увогуле гэта быў своеасаблівы куточак храма ў хаце: уверсе віселі абразы з выявамі Ісуса Хрыста і святых, якія маўклівай малітваю асвячалі хату і яе жыхароў. Яны ўпрыгожваліся ўзорнымі ручнікамі — набажнікамі, галінкамі асвечанай вярбы, пучкамі жытнёвых каласоў і лугавых траў. За абразамі захоўвалі таксама бутэлечку са свянцонай вадой, лекі ад розных хвароб. Да столі часам падвешваўся саламяны павук. Продкі верылі, што ён прыносіць у дом шчасце.
Далей размова пайшла пра посуд: гліняныя збаны, гарлачы, глякі, а таксама пра людзей, якія іх выраблялі — ганчароў. Гэта дзякуючы іх умелым рукам на верхнім дыску ганчарнага кола ажывала гліна, пераўтвараючыся ў гаршчкі ці іншыя пасудзіны, якія прасушвалі і абпальвалі на моцным агні, каб станавіліся трывалымі і не баяліся вады.
У кожным двары было шмат кашоў. Плялі іх нават дзеці, пасучы кароў, з лазовых дубцоў ці хваёвых карэньчыкаў з дапамогай ножыка-сцізорыка. Выкарыстоўваліся таксама карабы, сплеценыя з дубу, бяросты, лазы ці саломы то ў выглядзе бочачкі, то гаршчка, у залежнасці ад выдумкі і фантазіі. Былі яшчэ і вярэнькі — круглыя ці прадаўгаватыя каробкі — лубяныя, берасцяныя, лазовыя з вечкамі ці без іх, з адной альбо дзвюма ручкамі. У іх пераносілі на плячах вяскоўцы прадукты і гародніну. Дарэчы, кашы і сёння выкарыстоўваюцца пад-
час збору ўраджаю. З імі і ў лес бегаюць, калі год багаты на грыбы. А вось карабы засталіся ў казках.
З даўніх часоў, як паведалі вучні, вызначалася выключная роля хлеба ў жыцці чалавека. Людзі цанілі не толькі колас, але і сцябло. Гэта быў добры і танны матэрыял, з якога плялі карзіны, посуд, цацкі, упрыгожванні і шмат чаго іншага. Акрамя саломы, для пляцення шырока выкарыстоўвалі лазу — галлё вінаграду і вярбовых кустоў, а таксама лыка. З палосак кары маладых лісцёвых дрэў, пераважна ліпы, з бяросты ці пянькі — канапляных вяровачак — на драўлянай калодцы рабілі лапці. У петлі-вушкі, якія былі па баках, зацягваліся аборы — вераўчаныя ці раменныя шнуркі: імі прывязвалі старадаўні абутак да ног. Падэшву для трываласці падпляталі тым жа лыкам, пянькою, зрэдку падшывалі скураю. А на ногі накручваліся палатняныя анучы, зімой — суконкі, каб было цяплей. І сёння лапці «скрыпяць» у казках. І не абутак вінаваты, а чалавек, калі з яго, недарэкі, смяюцца: «Лапаць ты!».
Ішла на свяце таксама размова пра рэчы, упрыгожаныя вышыўкай. Характэрныя прыёмы гэтага рамяства, арыгінальныя ўзоры сапраўды беражліва захоўваліся і развіваліся, асабліва ва ўпрыгожанні адзення і шматлікіх рэчаў хатняга ўжытку. З пакалення ў пакаленне перадаваліся навыкі майстэрства і адмысловыя рэчы — ручнікі, абрусы, сурвэткі, дываны, вышытыя крыжам і гладдзю. Матэрыялам для іх служылі шарсцяныя, шаўковыя і льняныя тканіны. Напрыклад, для вырабу апошняй прымянялі лён, які сеялі, палолі, рвалі, слалі, мялі, трапалі, часалі, а атрыманы кужаль пралі, ніткі бялілі, фарбавалі…
А яшчэ беларускія майстры ўпрыгожвалі сцены дамоў, мэблю, шкатулкі, куфры роспісам. Радзей распісвалі посцілкі, шкло, посуд. Вокны прыбіраліся выцінанкамі. Выкарыстоўваліся таксама папяровыя ажурныя фіранкі, сурвэткі, абажуры, пано. У тыя часы ў вёсцы ўсе былі папрадухамі: маці вучыла дачку, бабуля — унучку. Не ўсе ведалі, што некалі прасніцу рабілі з суцэльнага дрэва, з густам аздаблялі: выразалі на лопасці фігуркі жывёл, птушак, лісцікі, пялёсткі, розныя ўзоры. З ёй дзяўчаты хадзілі на вячоркі, дзе пралі, левай рукой выцягваючы з воўны ці кудзелі валаконцы, а правай круцілі верацяно, навіваючы на яго нітку, і спявалі песні, прыпеўкі. А ў канцы зімы жанчыны пачыналі снаваць кросны, на якіх ткалася ўсё — ад грубага срэб’я да тонкага кужалю. І сёння ў некаторых вясковых хатах можна ўбачыць куфар, дзе ляжыць сапраўдны скарб — прыгожыя кашулі і фартушкі, посцілкі і абрусы… Такія абновы каштоўныя: у іх укладзена натхненне, душа таленавітых майстрых. Сатканае палатно вымачвалі, выбівалі пранікам, адбельвалі. Нават прыгажуня-дзяўчына лічылася беспасажніцай, калі не мела кужэльнага палатна — чыстага, белага, мяккага. А вось ручнікі выкарыстоўвалі яшчэ і ў беларускіх абрадах. Іх дарылі родзічам маладога. На яго станавіліся маладыя ў час вянчання. Дарэчы, і зараз самых паважаных гасцей сустракаюць хлебам-соллю на прыгожых ручніках. А ўзорныя посцілкі сталі ткаць значна пазней, чым ручнікі і абрусы, бо ложкі ўвайшлі ў быт сялян вельмі позна. Аднак мастацкае аздабленне іх вельмі высокае. І сёння яны могуць смела суседнічаць з сучаснымі дыванамі.
Вось так, пакрысе, і ажыццяўлялася дзякуючы сумесным намаганням педагога і вучняў падарожжа ў гістарычнае мінулае нашага беларускага народа. Прычым аповед пра жыццё і звычаі сялян суправаджаўся песнямі і вершаванымі радкамі. Патрэбна было вучням адгадаць загадкі. Праводзіўся і конкурс лепшых знаўцаў прыказак і прымавак па тэме вандроўкі. Акрамя таго, дэманстраваліся прадметы побыту, тагачаснае адзенне, абутак, падзелкі мясцовых майстроў.
«Мэта, якая ставілася напярэдадні фальклорнага свята настаўнікам перад дзецьмі, дасягнута, — гаварылі ў адзін голас педагогі, якія прысутнічалі на мерапрыемстве. — Дзевяцікласнікі змаглі не толькі атрымаць уяўленне пра беларускую хату, але і далучыцца да багатай культурнай спадчыны свайго народа і зразумець, як важна ведаць сваё мінулае і даражыць ім». Дарэчы, гэта не адзінае мерапрыемства, якое прайшло ў сценах Мядзельскай сярэдняй школы імя У. М. Дубоўкі, прысвечанае грамадзянскаму і патрыятычнаму выхаванню. Названая тэма ўвогуле займае значнае месца ў працы настаўніцы беларускай мовы і літаратуры Валянціны Уладзіміраўны Ермаковіч. Яна справядліва лічыць, што ў народа, які не ведае гісторыі сваёй краіны, няма перспектывы. А таму пастаянна настойліва раіць сваім вучням: «Часцей азірайцеся, сябры, у мінулае, каб не пагасла свечка на покуці — у хаце з матчынай душой, каб лягчэй было ісці наперад, у будучыню».
Марыя ЛУБНЕЎСКАЯ.
На здымку: падчас фальклорнага свята ў Мядзельскай СШ №1 імя У. М. Дубоўкі.