Ваенна-патрыятычнаму выхаванню ў нашай краіне заўсёды надавалася вялікае значэнне. Менавіта высокія грамадзянскія пачуцці, любоў да Радзімы, гатоўнасць абараніць яе ад ненавіснага ворага і адыгралі рашаючую ролю ў гады Вялікай Айчыннай вайны. Тады на барацьбу з фашызмам падняліся людзі ўсіх узростаў. Поплеч з дарослымі мужнасць, смеласць, вынослівасць праяўлялі дзеці, моладзь. Неўзабаве споўніцца 67 гадоў, як мы жывём пад мірным небам. І, на вялікае шчасце, не ваюем, а толькі гуляем у спартыўна-патрыятычныя гульні, якія бяруць пачатак з далёкіх пасляваенных часоў. Так, у «Зарніцы» з радасцю і захапленнем дэманстравалі веданне азоў ваеннай справы, фізічную загартоўку бабулі і дзядулі, а таксама бацькі сённяшніх школьнікаў. Памятаю, як і сама з аднакласнікамі старанна рыхтавалася да аналагічных спаборніцтваў. Развучвалі песні на патрыятычную тэматыку, маршыравалі строем, разбіралі і збіралі аўтамат Калашнікава, трэніраваліся ў стральбе з пнеўматычнай вінтоўкі… Вельмі хацелася вызначыцца сярод равеснікаў, не падвесці школу, настаўнікаў, сяброў.
Радасна ўдвайне, што традыцыі мінулых гадоў не забыты, а працягваюцца. Толькі цяпер, як мне здаецца, гульні нашага дзяцінства напоўнены дыханнем сённяшняга часу. А таму ў іх новы вобраз і крыху іншая назва — «Зарніца» і «Бастыёны мужнасці». У мінулую суботу сустрэліся лепшыя каманды школ азёрнага краю на базе СШ №2 г. Мядзел. Адкрываючы мерапрыемства, вядучая, намеснік дырэктара па выхаваўчай рабоце Сваткаўскай СШ імя М. Танка, А. М. Русак прадставіла прысутным арганізатараў гульняў і для адкрыцця іх запрасіла да мікрафона намесніка ваеннага камісара раёна маёра В. А. Якушава. Віталій Алегавіч адзначыў актыўнасць вучнёўскай моладзі, яе неабыякавасць да гісторыі сваёй краіны, цягу да ведаў, у тым ліку і ў ваеннай сферы. Пажадаў удзельнікам поспехаў і ўдачы і аб’явіў спаборніцтвы адкрытымі. Пра важнасць ваенна-патрыятычнага выхавання для падрастаючага пакалення гаварыла начальнік раённага аддзела адукацыі І. В. Рагоўская. З яе вуснаў прагучаў і наказ камандам: няхай пераможа мацнейшая! Затым галоўны суддзя — намеснік ваеннага камісара раёна В. А. Якушаў агучыў праграму і ўмовы правядзення спаборніцтваў. Адбылося таксама знаёмства і з судзейскай калегіяй.
На гэты раз 6 каманд былі задзейнічаны ў «Зарніцы» і 13 — у «Бастыёнах мужнасці». Па дзве дружыны прадставілі на мерапрыемства гімназія-інтэрнат г. Мядзел, Мядзельская №1, Нарацкія №1 і №2, Занарацкая сярэднія школы. Удзельнікі «Зарніцы» спаборнічалі ў конкурсах строю і песні, фізпадрыхтоўкі, на «Старонках гісторыі», стралялі ў ціры з пнеўматычнай вінтоўкі, рашалі білеты па правілах дарожнага руху і займаліся фігурным ваджэннем веласіпеда. Не толькі мне адной, але і многім балельшчыкам спадабалася, як упэўнена кіраваў двухколым сябрам Вадзім Каравацкі з Нарацкай СШ №1. Напэўна таму ён без штрафных балаў выканаў усе прапанаваныя заданні. А колькі лоўкасці, уважлівасці, спрыту давялося прымяніць хлопчыкам і дзяўчынкам у турысцкай эстафеце! З цікавасцю назірала за дзеяннямі на гэтым этапе спаборніцтваў каманды Мядзельскай СШ №1 імя
У. М. Дубоўкі. Выпрабаванні чакалі юных турыстаў і сапраўды няпростыя: неабходна было пераадолець адрэзак шляху па нацягнутых паралельна вяроўках, прайсці па бервяну, вызначыць адлегласць па карце і правільна назваць тапаграфічныя знакі, прапаўзці ў баявой пажарнай амуніцыі праз «мышалоўку», вызначыць азімут, прадэманстраваць уменне вязаць турысцкія вузлы, устанавіць палатку.
Паралельна з «Зарніцай» спаборнічалі ўдзельнікі «Бастыёнаў мужнасці». Яны таксама паказвалі сваю фізічную падрыхтоўку, трапнасць у стральбе з пнеўматычнай вінтоўкі, дружна маршыравалі строем з песняй. У ціры, напрыклад, давялося пабачыць зладжанае выступленне каманды Будслаўскай СШ у складзе Дзяніса Грузда, Аляксандра і Кацярыны Хацяновіч, якія «выбілі» адпаведна па 27, 28 і 25 ачкоў. Упэўнена паводзілі сябе на агнявым рубяжы і прадстаўнікі каманды Мядзельскай СШ №1 Яўген Малько, Віталія Івашкова і Максім Чарняўскі. Іх вынік таксама нядрэнны: адпаведна 25, 24 і 26 ачкоў. Аднак найбольш эмоцый, бадай, выклікала камбінаваная эстафета, дзе трэба было і палатку правільна і ў вызначаны час устанавіць, і аказаць дапамогу пацярпеўшаму, затым пераскочыць праз роў, трапна кінуць вучэбную гранату, паказаць уменне арыентавацца па карце, вызначыць азімут мясцовасці, правільна надзець і прабегчы ў процівагазах, прапаўзці ў баявой пажарнай амуніцыі праз «мышалоўку»… Дарэчы, да вядомых у папярэдніх гульнях этапаў на гэты раз дабавілася і некалькі новых — «шыфроўка», дзе неабходна было назваць слова на ваенную тэматыку, і праверка ведання воінскіх званняў — ад радавога да палкоўніка.
Нарэшце сціхлі баталіі, і ўсе ўдзельнікі, пераапрануўшыся, зноў застылі ў страі. Слова для падвядзення вынікаў прадастаўляецца галоўнаму суддзі спаборніцтваў — намесніку ваеннага камісара раёна
В. А. Якушаву. Ён адзначыў узросшае майстэрства каманд. Падзякаваў усім за ўдзел у гульнях. Затым пачалася цырымонія ўзнагароджання пераможцаў у намінацыях у кожным відзе праграмы як сярод каманд, так і ў індывідуальным заліку. Напрыклад, былі названы лепшымі: камандзірамі атрадаў — Анжаліка Шнітоўская з Нарацкай СШ №1 («Бастыёны мужнасці») і Дар’я Грыбоўская з Занарацкай СШ («Зарніца»), знаўцам правілаў дарожнага руху — Дар’я Пацкевіч з Мядзельскай СШ №1 імя У. М. Дубоўкі («Зарніца»), стралкамі — Анжаліка Шнітоўская з Нарацкай №1 і Аляксандр Хацяновіч з Будслаўскай СШ («Бастыёны мужнасці»), у «Зарніцы» — Анастасія Балаховіч са Слабодскай СШ імя А. Гурыновіча і Андрэй Бародзіч з Нарацкай №2 СШ. А ў агульнакамандным заліку ў гульні «Зарніца» першае месца заняла Мядзельская СШ №1 імя У. М. Дубоўкі, другое — Нарацкая №2 і трэцяе — Нарацкая №1 СШ. У «Бастыёнах мужнасці» пераможцам прызнана Будслаўская СШ, другое і трэцяе месцы дасталіся адпаведна Занарацкай СШ і СШ №2 г. Мядзел. Усе, хто вызначыўся, былі адзначаны дыпломамі, граматамі, прызамі. Напрыканцы мерапрыемства каманды Занарацкай СШ («Бастыёны мужнасці») і Нарацкай №1 СШ («Зарніца»), якія вызначыліся ў конкурсе строю і песні, упэўненым маршавым крокам прайшліся перад удзельнікамі спаборніцтваў, дэманструючы, што яны нездарма прызнаны лепшымі. «Всё, что мы любим, уметь защитить учит «Зарница» — спявалі пад апладысменты прысутных вучні з Занарачы. Словы песні разносіліся па наваколлі. Яны былі так да месца, бо асноўнае прызначэнне спартыўна-патрыятычных гульняў — вырасціць дастойных грамадзян сваёй Айчыны, гатовых, калі ўзнікне такая неабходнасць, стаць на абарону яе свяшчэнных межаў.
Марыя ЛУБНЕЎСКАЯ.
На здымках: 1. Начальнік аддзела адукацыі райвыканкама І. В. Рагоўская ўзнагароджвае пераможцу спартыўна-патрыятычнай гульні «Зарніца» — каманду Мядзельскай СШ №1 імя У. М. Дубоўкі (камандзір Яўген Лушчык); 2. Галоўны суддзя спаборніцтваў намеснік ваеннага камісара раёна В. А. Якушаў уручае грамату Анжаліцы Шнітоўскай з Нарацкай СШ №1у намінацыі «лепшы стралок»; 3. Каманда Будслаўскай СШ — пераможца спартыўна-патрыятычнай гульні «Бастыёны мужнасці»; 4. Сваткаўскія школьнікі пераадольваюць чарговы этап камбінаванай эстафеты.
Фота Таццяны Несцярэнка.