Вкл/Версия для слабовидящих
У мінулую пятніцу, 24 жніўня, у зале пасяджэнняў райвыканкама прайшла традыцыйная нарада настаўнікаў. Яе тэма: «Ад ідэі — да творчасці, ад творчасці — да якасці». У чарговы раз напярэдадні новага навучальнага года сабраліся разам прадстаўнікі школ, дашкольных і ўстаноў дадатковай адукацыі, ветэраны педагагічнай працы азёрнага краю, каб абмеркаваць вынікі работы, існуючыя праблемы, вызначыць стратэгічныя і задачы на бліжэйшы час. У рабоце жнівеньскай педагагічнай канферэнцыі прынялі ўдзел старшыня раённага Савета дэпутатаў А. А. Бароўка, намеснік старшыні райвыканкама І. І. Барыева, прарэктар Мінскага абласнога інстытута развіцця адукацыі, кандыдат педагагічных навук, дацэнт М. А. Краснова, начальнік аддзела ідэалагічн
ай работы райвыканкама В. С. Зуеўская, старшыня райкама прафсаюза работнікаў адукацыі і навукі І. В. Глінская.
Напачатку адбылося прадстаўленне дзейнасці сістэмы адукацыі Мядзельшчыны па асноўных напрамках з выкарыстаннем стэндаў. Мне, напрыклад, спадабалася, як загадчыца дашкольнага цэнтра развіцця дзіцяці к. п. Нарач Л. А. Бурая разам з выхаванцамі ўстановы, якую ўзначальвае, расказвалі пра сваё жыццё і паўсядзённыя заняткі. А яшчэ пра тое, што малышы з задавальненнем наведваюць цэнтр, дзе змястоўна і цікава праводзяць час. Што яны менш за астатніх хлопчыкаў і дзяўчынак курортнага пасёлка хварэюць. І, увогуле, пра тое, што дзяцінства — самая цудоўная і шчаслівая пара.
Заўважыла, што затрымліваліся педагогі раёна і каля стэнда гімназіі-інтэрната г. Мядзел. Гэта і не дзіўна. Каму ж не хочацца падрабязней даведацца пра работу самай прэстыжнай установы адукацыі раёна?! Невыпадкова ўсе з цікавасцю слухалі намесніка дырэктара
Л. А. Цяляк, якая не толькі вяла аповед пра справы і дасягненні гімназістаў, але і сцвярджала, што «вучань — факел, які патрэбна запаліць…». Не менш актуальнай была і тэма выступлення дырэктара Нарацкай СШ №2 Г. В. Крыштафовіча. А дытычыла яна актыўнага выкарыстання інтэрактыўных тэхналогій у працэсе ўрокаў і пазакласных мерапрыемстваў. Пра важнасць патрыятычнага выхавання ў жыцці юнай асобы гаварылі намеснік дырэктара Старагабскага ВПК дзіцячы сад-сярэдняя школа І. Ч. Босы і настаўнік гісторыі Сваткаўскай СШ імя М. Танка В. П. Ільюковіч. Іх стэнд так і называўся: «Захоўваючы гісторыю — ствараем будучыню». «Здаровы я — здаровая краіна» — лозунг сырмежскіх школьнікаў. Менавіта гэта і паспрабавалі данесці прысутным актыўныя прыхільнікі здаровага ладу жыцця, прызёры раённых спартыўных мерапрыемстваў, старшакласнікі Яўгенія Грыгаровіч і Мікалай Арэхаў. Пра важнасць сям’і ў жыцці юнага грамадзяніна вялі расповед дырэктар сацыяльна-педагагічнага цэнтра
Н. Ю. Карабейнік і вядучы спецыяліст раённага аддзела адукацыі С. М. Кундра. Шмат цікавага для сябе змаглі пачэрпнуць настаўнікі азёрнага краю ля стэнда «Прафесійнае развіццё педагога ў сістэме метадычнай работы», дзе гаспадарыла загадчыца раённага метадычнага кабінета Г. Я. Саўчык.
Пачаты перад канферэнцыяй дыялог затым прадоўжыўся ў зале. Безумоўна, адзін з самых урачыстых 
момантаў мерапрыемства — ушанаванне маладых настаўнікаў. Сем выпускнікоў вышэйшых навучальных устаноў папоўнілі дружную сям’ю педагогаў Мядзельшчыны. Сярод іх Ю. А. Купрэвіч, М. А. Клімовіч, Т. У. Мычко, К. В. Завадскі, В. Л. Дзевятоўская, Т. Г. Кайко, А. М. Хадалёнак. Усе яны пачнуць самастойную працу ў розных установах адукацыі азёрнага краю. Шчырыя віншаванні і найлепшыя пажаданні ў вершаванай форме даслалі ім вучні Мядзельскай СШ імя У. М. Дубоўкі. А праведзенае бліц-апытанне прадэманстравала, што моладзь не падвядзе і стане дастойнай прадаўжальніцай справы вопытных калег.
Кароткі агляд асноўных падзей са сферы адукацыі раёна, праведзены вядучымі, а гэта дырэктарам цэнтра турызму раёна
С. Г. Нехвядовічам і намеснікам дырэктара Нарацкай СШ №2
І. В. Шырко, яшчэ раз напомніў прысутным, што настаўнікі — людзі неабыякавыя, творчыя, а дзеці, з якімі яны працуць, — здольныя і таленавітыя. Дарэчы, выдатным дапаўненнем да сказанага стаў паказаны слайд-фільм, а таксама выступленне начальніка раённага аддзела адукацыі І. В. Рагоўскай.
— Адукацыя — той надзейны фундамент, на якім будуецца дабрабыт Беларусі, — адзначыла Ірына Валянцінаўна. — Пагэтаму мы робім усё неабходнае для таго, каб кожны юны грамадзянін раёна мог атрымаць глыбокія веды, рэалізаваць свае таленты, пасябраваць са спортам, стаць сапраўдным патрыётам любімай Радзімы.
Далей дакладчыца спынілася на выкананні паказчыкаў Праграмы развіцця сістэмы дашкольнай адукацыі на 2009-2014 гады па захаванні сеткі дашкольных устаноў. Закранула яна і тэму ўкаранення новых форм, што дазваляюць паспяхова вырашаць задачу забеспячэння ўсебаковага развіцця дзяцей, якія не наведваюць дашкольныя ўстановы. Засяродзіла таксама ўвагу на мерах, якія садзейнічаюць павышэнню якасці адукацыйнага працэсу. І, найперш, на арганізацыі факультатыўных заняткаў, развіцці алімпіяднага руху і іншых формах работы з адоранымі вучнямі. Не абышла важнасць грамадзянска-патрыятычнага выхавання, ролю ў гэтай сувязі школьных грамадскіх фарміраванняў — БРСМ і БРПА. Назвала рэалізоўваемыя праекты педагагічных ініцыятыў, па якіх сабраны адпаведны вопыт і тры новыя, ажыццяўленне якіх пачнецца ў бягучым навучальным годзе. Значнае месца ў дакладзе адводзілася рабоце сацыяльна-педагагічнай службы па раннім выяўленні і вырашэнні праблем сямейнага недабрабыту і ўвогуле праяўленні клопату пра дзяцей, умацаванне іх здароўя. У цэнтры ўвагі былі і задачы па ўдасканаленні вучэбна-выхаваўчага працэсу. Ішла размова, вядома, і пра рост прафесійнага майстэрства кадраў, якім даверана работа з падрастаючым пакаленнем. Акрамя таго, прагучалі ў дакладзе прозвішчы кіраўнікоў розных устаноў адукацыі, настаўнікаў, дзякуючы неабыякавасці, ініцыятыве і творчаму падыходу якіх да даручанай справы і дасягаецца пастаўленая перад адукацыяй азёрнага краю мэта.
З прывітальным словам да ўдзельнікаў нарады звярнулася намеснік старшыні райвыканкама І. І. Барыева. Ведучы размову пра асаблівую ролю педагагічных работнікаў на сучасным этапе і ўзросшыя да іх патрабаванні, Іна Іванаўна канстатавала:
— На якой бы мове не гучала слова «настаўнік», яно заўсёды вымаўляецца з вялікай пашанай і павагай. З вашай дапамогай, паважаныя педагогі, мы адкрылі для сябе свет, пазналі сакрэты навук, без якіх немагчыма ўявіць сабе сучаснага чалавека. Кожны дзень вы ўкладваеце свае веды і жыццёвы вопыт у розум і душы новага пакалення, здольнага творча думаць, прымаць правільныя, грам
атныя рашэнні. Работа настаўніка — гэта высокае інтэлектуальнае і грамадзянскае напружанне. І ў той жа час гэта захопліваючая і бясцэнная для грамадства і людзей праца. Яна захоўвае ў вашых вучняў і выхаванцаў удзячнасць на ўсё жыццё.
Пасля выказвання найлепшых пажаданняў у адрас «сейбітаў разумнага, дорага, вечнага», як часта называюць педагогаў, І. І. Барыева выканала прыемную місію — уручыла ўзнагароды раённага выканаўчага камітэта асобам, якія найбольш вызначыліся. Так, граматай райвыканкама адзначана плённая работа настаўніцы замежнай мовы Нарацкай СШ №2 В. С. Шпакоўскай, а таксама вучаніцы гэтай жа школы Алены Лапцік — за выдатныя дасягненні ў спорце. Падзякі старшыні райвыканкама атрымалі дырэктар гімназіі-інтэрната г. Мядзел В. П. Клімовіч і трэнеры СДЮШАР
Ю. Е. Іваноў і А. Ф. Карпей.
Змястоўным было выступленне і прадстаўніцы аблвыканкама М. А. Красновай. Марына Іванаўна, у прыватнасці, адзначыла, што навучальныя ўстановы азёрнага краю займаюць дастойнае месца ў сістэме адукацыі Міншчыны. Пажадала педагогам здароўя, дабрабы-
ту, поспехаў у працы і жыцці. Акрамя таго, уручыла граматы Міністэрства адукацыі Рэспублікі Беларусь 
дырэктару Камароўскай сярэдняй школы Т. В. Урбановіч і выхавальніцы яслей-сада №4 І. В. Скурко. Граматамі ўпраўлення адукацыі Мінаблвыканкама ўзнагароджаны выхавальніца яслей-сада №2 Т. В. Хіхіч, настаўнікі: біялогіі з гімназіі-інтэрната г. Мядзел Л. К. Шчалкунова, працоўнага навучання з Мядзельскай СШ №1 імя У. М. Дубоўкі П. М. Бабровіч і былая загадчыца планава-эканамічнага сектара раённага аддзела адукацыі Л. П. Хацяновіч. Дыпломамі: упраўлення адукацыі Мінаблвыканкама адзначана праца дашкольнага цэнтра развіцця дзіцяці к. п. Нарач (загадчыца
Л. А. Бурая), Мінскага абласнога вучэбна-метадычнага кабінета — намесніка дырэктара цэнтра творчасці дзяцей і моладзі раёна Я. С. Чарняўскай. Начальнік аддзела адукацыі райвыканкама І. В. Рагоўская атрымала падзяку начальніка ўпраўлення адукацыі аблвыканкама Т. І. Данілевіч за падрыхтоўку школ да новага навучальнага года. Шэрагу педагогаў, а таксама старшыні папячыцельскага савета Свірскай сярэдняй школы А. З. Ляховіч уручаны граматы раённага аддзела адукацыі.
Напрыканцы ўрачыстасці ўдзельнікі канферэнцыі прынялі рэзалюцыю, накіраваную на паспяховае вырашэнне задач, пастаўленых перад педагагічнай грамадскасцю. А закончылася мерапрыемства святочным канцэртам, падрыхтаваным юнымі талентамі, якія адпачываюць у НДЦ «Зубраня».
Марыя ЛУБНЕЎСКАЯ.
На здымках: Намеснік старшыні райвыканкама І. І. Барыева ўручае грамату райвыканкама настаўніцы замежнай мовы Нарацкай СШ №2 В. С. Шпакоўскай; Ветэраны працы: Л. П. Хацяновіч;
Р. І. Барташэвіч, А. Ф. Світа; Г. У. Багуцкая і А. К. Будзько; Прарэктар Мінскага абласнога інстытута развіцця адукацыі М. А. Краснова ўзнагароджвае граматай Міністэрства адукацыі Рэспублікі Беларусь дырэктара Камароўскай СШ Т. В. Урбановіч; Загадчыца дашкольнага цэнтра развіцця дзіцяці к. п. Нарач Л. А. Бурая разам з выхаванцамі расказвае пра работу ўстановы; Маладыя настаўнікі.
Фота Таццяны Несцярэнкі.
