У шосты раз прайшла раённая алімпіяда па Правілах дарожнага руху сярод школьнікаў. Адбылася яна на базе Дома дзіцячай творчасці. Галоўнымі мэтамі мерапрыемства значыліся прапаганда вывучэння Правілаў дарожнага руху сярод дзяцей і падлеткаў, прывіццё ім навыкаў бяспечных паводзін на вуліцах і дарогах, а ў ліку арганізатараў былі аддзяленне ДАІ райаддзела ўнутраных спраў, аддзелы адукацыі і па справах моладзі, райкам БРСМ.
Прынялі ўдзел у алімпіядзе 12 каманд школ раёна. Гонар кожнай навучальнай установы адстойвалі па адным прадстаўніку пятых, шостых і сёмых класаў. Ім трэба было адказаць на пытанні ў білетах, а таксама справіцца з мультымедыйнымі заданнямі.
— Алімпіяда прайшла без заўваг з боку судзейскай калегіі, — паведаміў старшы інспектар ДПС аддзялення ДАІ Андрэй Купрэвіч. — Заданні дзецям прапаноўваліся нялёгкія, але ўсе былі ў роўных умовах. Перамаглі ж мацнейшыя — тыя, хто
сур’ёзна рыхтаваўся да алімпіяды.
Вось якраз пра лепшых знаўцаў правілаў зараз і даведаемся. Трэцяе месца заваявалі прадстаўнікі Сваткаўскай сярэдняй школы, на другім месцы — вучні гімназіі №1 райцэнтра. А найлепшыя вынікі паказала каманда САШ №2 Мядзела. У яе складзе былі Фрыда Савіцкая, Ілья Купрэвіч і Ілья Серада. Прычым, перамаглі яны з вялікім адрывам ад іншых каманд.
Прызналіся пераможцы, што заданні былі няпростыя. Але ж паспрыяла тое, што як след рыхтаваліся да алімпіяды, у тым ліку і з дапамогай камп’ютарных праграм. І шчыра ўдзячны за падрыхтоўку дарослым, асабліва Яну Нікадзімавічу Таразевічу.
А свае веды лепшым знаўцам Правілаў дарожнага руху трэба будзе пацвердзіць на падобнай абласной алімпіядзе, якая пройдзе ў Валожыне. Пажадаем ім поспехаў на прадстаўнічым мерапрыемстве.
Аляксандр ВЫСОЦКІ.
На здымку: каманды-прызёры спаборніцтваў са Сваткаўскай САШ і гімназіі №1.
Фота аўтара.