Вучаніцы Нарацкай сярэдняй школы №2 Таццяне Абалевіч сёлета не аднойчы давялося пабываць на ўшанаваннях у райвыканкаме. Яна прымала ўзнагароды падчас злёту перадавікоў галін народнай гаспадаркі Мядзельшчыны, на ўручэнні стыпендый раённага выканаўчага камітэта таленавітай моладзі. Заслужыла гэта поспехамі ў вывучэнні біялогіі. На рахунку Таццяны — перамога на раённай алімпіядзе, добрыя выступленні на навукова-практычных канферэнцыях. Так, на рэспубліканскай канферэнцыі яна атрымала Дыплом другой ступені за работу, над якой працавала разам з Аляксеем Саковічам. А прысвячалася тая вывучэнню папуляцыі мурашоў. — Чаму захапілася менавіта біялогіяй? — пытаю ў Таццяны. — У гэтым вялікая заслуга Алены Мечыславаўны Раманьковай. Яна вельмі добрая настаўніца: растлумачвае ўсё даходліва, займаецца з намі дадаткова. Па ўсім бачна, што захапленне біялогіяй у дзяўчыны сур’ёзнае: Таццяна збіраецца ў будучым звязаць сваё жыццё з гэтай навукай. Фота Аляксандра ВЫСОЦКАГА.