З галоўным аграномам СВК «Сваткі» Т. У. Мінчук не раз даводзілася сустракацца на палетках таварыства падчас важных сельскагаспадарчых кампаній. Шмат год яна адпрацавала ў раслінаводстве, характарызуецца ў калектыве як адказны, добрасумленны чалавек. А яшчэ і сціплы. Пра сваю работу Тамара Уладзіміраўна расказваць не любіць, тым больш, хваліцца здабыткамі. Маўляў, выконваю свае абавязкі, вось і ўсё.
Родам Т. У. Мінчук з вёскі Наўры, што непадалёку ад Сватак. Напачатку прыйшла працаваць у мясцовы калгас брыгадзірам, паступіла на завочнае аддзяленне тагачаснага Смілавіцкага сельскагаспадарчага тэхнікума. Вывучылася і засталася ў гаспадарцы. Аб чым і зараз не шкадуе. Дарэчы, і замуж Тамара выйшла за тамтэйшага хлопца з Нявер, які працаваў аграномам.
— Горад мяне ніколі надта не вабіў, — расказвае Тамара Уладзіміраўна. — Яшчэ ў школе марыла, калі вырасту, працаваць у полі, з людзьмі. Вядома ж, не магла тады поўнасцю ўяўляць, наколькі гэта работа цяжкая, клапатлівая. Але ж як прыемна потым паглядзець на вынік сваёй працы. Канечне, калі гэты вынік дастойны…
Прызначылі Т. У. Мінчук на пасаду галоўнага агранома ў 2009-ым, які аказаўся самым ураджайным у гісторыі гаспадаркі ды і ў цэлым вельмі плённым для хлебаробаў Мядзельшчыны. Вядома, тут не варта скідваць з рахунку спагадлівасць прыроды. І, тым не менш, без шчырай працы на палетках, як вядома, ніякія «спрыяльныя ўмовы» не дапамогуць.
— Што тычыцца мяне, як спецыяліста, — працягвае Тамара Уладзіміраўна, — найперш трэба няўхільна трымацца «генеральнай лініі», забяспечваць вырашэнне задач, пастаўленых кіраўніком гаспадаркі. Мала ведаць тэхналогію, яе яшчэ неабходна рэалізаваць непасрэдна на палетку! А гэта ўжо канкрэтнае ўзаемадзеянне з падначаленымі, тымі ж механізатарамі. І спытаю строга, а ў іншым выпадку і папрашу. Значная нагрузка кладзецца на іх плечы, перапынку ў сезонных работах амаль што няма. Прыемна засведчыць, што хлопцы падабраліся ў нас талковыя. Ім можна даверыць складаную тэхніку, даручыць выкананне любога, самага адказнага задання. Што я без іх?!
— Тамара Уладзіміраўна, з таго часу, як вы ўпершыню выйшлі ў поле, шмат чаго змянілася. Наколькі цяпер лягчэй працаваць?
— Пытанне, думаю, хутчэй рытарычнае. Праца на зямлі ніколі не была і не будзе лёгкай. Бо вельмі шмат фактараў уплываюць на канчатковы вынік. Хаця, канечне, змены адбыліся істотныя. Памятаю, як некалі засыпалі ў раскідвальнік мінеральныя ўгнаенні вядзерцамі, ды і глебаапрацоўчая, пасяўная тэхніка была не такой прадукцыйнай. Не параўнаць з цяперашнімі агрэгатамі, магутнымі трактарамі. Людзей у вёсцы значна паменела, і толькі своечасовае абнаўленне машынна-трактарнага парка дае магчымасць забяспечваць належныя тэмпы работ на палетках гаспадаркі, працаваць па сучасных тэхналогіях. Станоўчыя перамены адбудуцца і ў гэтым сезоне. Зараз вось, напрыклад, пачалі мантаж новай сушылкі «ЗСК-40 Ш». Пуск яе ў эксплуатацыю дазволіць больш аператыўна ўпраўляцца з дапрацоўкай ураджаю падчас уборачнай кампаніі, збожжа ўжо не будзе залежвацца на пляцоўках у чаканні «чаргі». Не за гарамі вясенняя пасяўная, да яе таксама рыхтуемся самым сур’ёзным чынам. Ладзім тэхніку і агрэгаты, падрыхтавалі насенне пад поўную патрэбу, завезлі калійныя ўгнаенні, дастаўляем на палі арганіку. Карацей, работы вядуцца па плану, і да галоўнага хлебаробскага старту будзем у «баявой гатоўнасці».
Пасяўная, як заўсёды, запатрабуе намаганняў усіх і кожнага. У тым ліку, зразумела, і галоўнага агранома гаспадаркі Т. У. Мінчук. Пажадаем Тамары Уладзіміраўне плёну. А першай узнагародай ёй будзе за клопат песня жаўрука ў блакітным красавіцкім небе!
Аляксандр БЫКАЎ.
На здымку: галоўны аграном ААТ «Сваткі» Т. У. Мінчук.
Фота Таццяны Несцярэнка.