У апошні час рэзка павялічылася колькасць крадзяжоў з выкарыстаннем камп’ютэрнай тэхнікі. Не застаўся, на жаль, убаку і наш раён. Калі ў 2008-2009 гадах зарэгістравана па аднаму злачынству такой катэгорыі, то за першае пагоддзе 2010-га — ужо 7. Адзіным спосабам крадзяжу пакуль з’яўляецца ўвядзенне ў камп’ютэрную сістэму ілжывай інфармацыі аб выкарыстанні пластыкавай банкаўскай карткі яе ўтрымальнікам, персанальнага ідэнтыфікацыйнага нумара ПІН-кода з несанкцыянаваным доступам.
Следчым аддзелам папярэдняга даследавання ў чэрвені 2010 года РАУС узбуджаны крымінальныя справы ў адносінах да жыхароў раёна К. і Ш. па прыкметах злачынства, прадугледжанага ч. 2 арт. 212 Крымінальнага Кодэкса Рэспублікі Беларусь.
У абодвух выпадках жанчыны атрымалі доступ да інфармацыі карт-рахункаў уладальнікаў банкаўскіх пластыкавых картак у банкаматах у г. Мядзел і в. Нарач, пасля скарысталіся ўкрадзенымі грашовымі сродкамі. Злачынцы былі хутка выяўлены.
Адзначым, што банкаўскія пластыкавыя карткі былі папярэдне ўкрадзены, а персанальныя ідэнтыфікацыйныя нумары ПІН-коды захоўваліся там жа, што дазволіла без асаблівых цяжкасцей імі пакарыстацца. Гэта сведчыць пра тое, што ўладальнікі картак маюць нізкі ўзровень разумення інфармацыйнай бяспекі, што, у сваю чаргу, сведчыць пра недастатковую растлумачальную работу банкаў пры заключэнні дагавораў карт-рахункаў.
Звяртаем вашу ўвагу, што разам з банкаўскай пластыкавай карткай вы атрымліваеце канверт, дзе ўтрымліваецца асабісты сакрэтны код для карыстання банкаматам. Ні пры якіх абставінах не паведамляйце яго пабочным асобам, у тым ліку і супрацоўнікам банка. Запомніце яго альбо запішыце без пазначэння і захоўвайце ў месцы, даступным толькі вам. І ні ў якім разе не пакідайце асабісты сакрэтны код на пластыкавай картцы!
В. ХРАПАН.
Спецыяліст першай катэгорыі
СА ПР РАУС.