Адбыўся абласны семінар

На базе гімназіі-інтэрната г. Мядзел адбыўся абласны семінар на тэму “Адукацыя дарослых у кантэксце вуснагістарычных даследаванняў”. Мерапрыемства праведзена ў рамках праекта “Стварэнне трох рэгіянальных цэнтраў вуснагістарычных даследаванняў”. Акрамя прадстаўнікоў Мядзельшчыны, у ім прынялі ўдзел работнікі педагагічнай сферы Любанскага і Капыльскага раёнаў.

Вельмі насычаным аказаўся першы дзень работы семінара. Напачатку ўвяла ўсіх у курс справы начальнік аддзела міжнароднага супрацоўніцтва Мінскага абласнога інстытута развіцця адукацыі А. І. Калістратава. Яна расказала пра мэты і задачы семінара, агучыла праграму заняткаў. Затым адбылася прэзентацыя Прадстаўніцтва Нямецкай асацыяцыі народных універсітэтаў у Рэспубліцы Беларусь. Памочнік главы Прадстаўніцтва
зарэгістраванага аб’яднання “Deutscher Volkshahschul Ver­band e.V” (ФРГ) у Рэспубліцы Беларусь І. Л. Краўчонак расказала пра  гісторыю гэтай арганізацыі, яе дзейнасць па развіцці адукацыі дарослых у Беларусі, рэалізацыю ў нашай краіне разнастайных еўрапейскіх праектаў.

— Наша аўдыторыя, — сказала Іна Леанідаўна, — гэта, у першую чаргу, дарослыя, якія маюць абмежаваны доступ да адпаведных ведаў: беспрацоўныя, пажылыя людзі, інваліды,  тыя, хто знаходзіцца ў месцах зняволення. Назапашаны патэнцыял адукацыі дарослых выкарыстоўваецца таксама для вырашэння розных канфліктаў, дасягнення ўзаемаразумення паміж людзьмі. Да­рэчы, наш рэгіянальны офіс знаходзіцца ў Кіеве і ахоплівае Беларусь, Малдову і Украіну.

Затым на семінары пайшла гаворка аб дзейнасці рэгіянальных праектных груп “Адукацыя дарослых і вусная гісторыя”. Намеснік дырэктара Слабодакучынскай сярэдняй школы Капыль­скага раёна, каардынатар праектнай  групы Б. М. Дзенісюк расказаў пра ролю СМІ ў інфармацыйнай падтрымцы праектнай дзейнасці, стасункі з грамадскімі арганізацыямі, пісьменнікамі, чы­тачамі. Прысутныя таксама мелі магчымасць пазнаёміцца з тэматычнай старонкай “Спадчына”, якая рэгулярна змяшчаецца ў тамтэйшай раёнцы.

А вось настаўнік гісторыі Сваткаўскай сярэдняй школы імя
М. Танка, праектны каардынатар Мядзельскага раёна В. П. Ільюковіч спыніўся на метадах вуснагістарычнай адукацыі пажылых людзей.

— Гэта работа, безумоўна, накладвае свой адбітак, — заўважыў Валерый Пятровіч. — Любая  гу­тарка прадугледжвае праяўленне ўвагі  аднаго чалавека да другога, разуменне яго думак, інтарэсаў, патрэб. І чым больш шчырай атрымаецца размова, тым больш новай і цікавай інфармацыі атрымае чалавек. Трэба таксама ўлічваць, што мова пажылога чалавека недасканалая, ды і слых ужо не той, яму няпроста ўспрымаць субяседніка. Гэта трэба мець заўсёды на ўвазе і дакладна вымаўляць пытанні, сачыць за артыкуляцыяй, рухамі, каб цябе добра разумелі. І вельмі важна выдзеліць галоўнае ў размове з пажылымі, паводзіць сябе дыпламатычна. І ўлічваць таксама пры такіх кантактах, кім лю­дзі былі ў сваім жыцці, якой адукаванасці.

Расказаў В. П. Ільюковіч пра канкрэтную работу. Так, нядаўна на базе Сваткаўскай школы  адбылося  пасяджэнне ветэранаў педагагічнай працы нашага раёна. Сустрэча была прымеркавана да 100-годдзя з дня нараджэння Мак­сіма Танка. У прыватнасці, настаўнікі са стажам падзяліліся  ўспамінамі аб сустрэчах са славутым земляком, іх аповед аказаўся цікавым і карысным для многіх.

Выступіла на семінары па пытаннях пашырэння партнёрс­кіх арганізацый, якія ўдзельнічаюць у рэалізацыі праекта, вядучы спецыяліст РАА Любан­скага раёна Т. С. Кругленя. Бы­ла абмеркавана і такая тэма як піяр-дзейнасць цэнтраў вусна­гістарычных даследаванняў.  Адбыўся майстар-клас “Танец як форма камунікацыі ў адукацыі дарослых”, які дапамаглі правесці ўдзель­нікі сама­дзей­нага мастацкага калектыву “Весялухі” Старамя­дзель­скага Дома вольнага часу.

На наступны дзень семі­нар прадоўжыў сваю работу. Педагогі на нейкі час пабывалі ў ролі рэдактараў газет і паспрабавалі на старонках сімвалічных выданняў прапіярыць свае цэнтры. Занятак аказаўся даволі павучальным і паказаў крэатыўны  падыход гісторыкаў да выканання задання. Што, думаецца, таксама дапаможа ім у далейшай рабоце.

Як адзначыла ў заключэнні
А. І. Калістратава, семінар прайшоў паспяхова і паспрыяе далейшаму плёну ў гэтым  накірунку. Яго ўдзельнікі атрымалі ў якасці памятных падарункаў друкаваную прадукцыю Нацыянальнага парку “Нарачанскі” і Мядзель­скага музея Народнай славы.

На заканчэнне дадам, падчас падарожжа калег на Мядзельшчыну выступіў у ролі гіда настаўнік гісторыі Старагабскай  сярэдняй школы-д/с.  У. С. Серадзінскі.

Аляксандр БЫКАЎ.

На здымках: 1. Падчас работы абласнога семінара “Адукацыя дарослых у кантэксце вуснагістарычных даследаванняў”;  2. Выступае памочнік главы Прадстаўніцтва зарэгістрава­нага аб’яднання “Deutscher Volkshahschul Verband e.V” (ФРГ) у Рэспубліцы Беларусь
І. Л. Краўчонак; 3. Майстар-клас “Танец як форма камунікацыі ў адукацыі дарослых” праводзіць мастацкі калектыў “Весялухі” Старамядзельскага Дома вольнага часу.

Фота Таццяны Несцярэнкі.