Прышчэпка супраць каранавіруснай інфекцыі — досведам дзеліцца Уладзімір Баравы

Уладзімір БАРАВЫ, дырэктар санаторыя “Белая Русь”:

— Асабіста я прайшоў ужо два этапы вакцынацыі: 19 сакавіка і 9 красавіка. Як адчуваў сябе? Трэба сказаць, што ўвогуле нармальна. Пасля першай прышчэпкі ніякіх пабочных эфектаў наогул не назіралася: не павышалася тэмпература, не было ні кашлю, ні слабасці. Толькі вечарам вельмі хацелася есці. Дарэчы, добры апетыт пасля першай прышчэпкі адзначалі пазней і некаторыя мае сябры, калегі. Пасля другой фазы вакцынацыі праз некаторы час мяне пранялі дрыжыкі. Выпіў таблетку ібукліну, накрыўся, каб сагрэцца, а калі ўстаў — адчуваў сябе нармальна, як і звычайна.
Меркаванні наконт прышчэпак ва ўсіх розныя. Напрыклад, сын мой не раіў мне праходзіць вакцынацыю, дачка, наадварот, казала пра яе неабходнасць.

Я ж рашыўся зрабіць прышчэпку на некалькіх прычынах. Па-першае, для сябе, свайго ўласнага здароўя. Бо не захварэю сам і не заражу каранавірусам нікога. Па-другое, сваім учынкам паказаў прыклад членам нашага калектыву, які працуе з людзьмі. Прычым з самых розных рэгіёнаў. Па-трэцяе, правядзенне вакцынацыі супраць COVID-19 садзейнічае вырашэнню пытання бяспекі для здароўя, як сваіх работнікаў, так і тых людзей, якія прыязджаюць да нас на адпачынак. А значыць, у пэўнай ступені і павышэнню іміджу здраўніцы, якая вядома не толькі ў Беларусі, але і за яе межамі.

Што датычыць нашага калектыву, то пакуль прывіліся разам са мной восем чалавек. Магло б быць і больш, аднак многія перахварэлі на каранавірус, а асобныя і не адзін раз. Каб не даваць дадатковую нагрузку на арганізм, некаторыя работнікі вырашылі пэўны час пачакаць і пазней прайсці вакцынацыю. Ва ўсялякім разе такое жаданне ў большасці супрацоўнікаў санаторыя ёсць.