ПРЫГАДВАЮ чэрвень 2006 года. Пасля рэканструкцыі ў санаторыі «Нарачанскі бераг» адкрываўся спальны корпус №2. З гэтай нагоды на Мядзельшчыну завіталі старшыня Федэрацыі прафсаюзаў Беларусі Л. П. Козік і іншыя адказныя асобы. Тады Леанід Пятровіч зазначыў, што гэта толькі пачатак вялікай работы, якая будзе праведзена па мадэрнізацыі спальных корпусаў, умацаванні матэрыяльна-тэхнічнай базы здраўніцы. І словы прафсаюзнага лідара не разышліся са справай. Санаторый развіваецца толькі дзякуючы інвестыцыям уласніка, якім з’яўляецца Федэрацыя прафсаюзаў Беларусі.За апошнія два з паловай гады было інвеставана шмат грашовых сродкаў. Толькі на мадэрнізацыю корпуса №3 выдзелена больш за чатыры мільярды рублёў. Дарэчы, ён уведзены ў эксплуатацыю ў пачатку чэрвеня мінулага года. І вось у гісторыі здраўніцы чарговая падзея: 29 мая 2012 года пасля рэканструкцыі ўводзіцца ў эксплуатацыю спальны корпус №1.
На тэрыторыі санаторыя з раніцы гучыць музыка. На «біс» успрымаюцца ўдзячнымі гледачамі, а гэта ў пераважнай большасці адпачываючыя і работнікі здраўніцы, якія не заняты непасрэдна на сваіх працоўных месцах, выступленні знакамітай на Мядзельшчыне Таццяны Хрол. Многія не ўстрымліваюцца і пад заўзятыя мелодыі кідаюцца ў скокі. Па- радаваў прысутных сваім выступленнем і народны ансамбль «Паазер’е» з Пастаў…
Да мікрафона падыходзіць вядучая ўрачыстасці, загадчыца аддзела культурна-масавай і вучэбна-выхаваўчай работы Н. А. Купрэвіч. Наталля Аркадзьеўна шчыра ўсіх вітае са знамянальнай падзеяй, адкрыццём корпуса №1, ці як яна заўважыла — уваходзінамі, і прадстаўляе гасцей свята. Гэта старшыня Федэрацыі прафсаюзаў Беларусі Леанід Пятровіч Козік, генеральны дырэктар санаторна-курортнага ўнітарнага прадпрыемства «Белпрафсаюзкурорт» Анатолій Юр’евіч Васкевіч, старшыня райвыканкама Аляксандр Іванавіч Даніленка, дырэктар будаўнічай арганізацыі «Гарант якасці» Максім Уладзіміравіч Падабед, генеральны дырэктар прадпрыемства «Белпрафбуд» Іван Рыгоравіч Шчэрба, старшыні галіновых рэспубліканскіх камітэтаў прафсаюза, начальнікі ўпраўленняў і службаў Федэрацыі прафсаюзаў Беларусі, галоўныя ўрачы санаторыяў сістэмы «Белпрафсаюзкурорт». Духмяным караваем сустрэлі гасцей гаспадары.
Першаму слова прадастаўляецца Л. П. Козіку. Ён прывітаў прысутных і падкрэсліў:
— Сёння важная падзея: закончылі рэканструкцыю яшчэ аднаго жылога корпуса санаторыя «Нарачанскі бераг». Наперадзе яшчэ рамонт галоўнага корпуса. Упэўнены, што ў хуткім часе і гэту работу выканаем. А ў цэлым толькі шэсць гадоў таму ўзяліся за рэканструкцыю здраўніцы. І сёння бачны вынікі гэтай работы…
Шчырыя словы падзякі выказаў Л. П. Козік мясцовай выканаўчай уладзе і асабіста старшыні райвыканкама А. І. Даніленку за падтрымку і дапамогу ў вырашэнні многіх задач.
— Хачу запэўніць, што ўсё прадугледжанае Дзяржаўнай праграмай развіцця Нарачанскага рэгіёну па нашых аб’ектах будзе выканана своечасова і ў поўным аб’ёме. Тут, на Мядзельшчыне, у нас некалькі аб’ектаў. Гэта санаторый «Нарач», турыстычны комплекс «Нарач» з яго філіяламі «Швакшты» і «Нарачанка», — падкрэсліў Леанід Пятровіч. — Дарэчы, на туркомплексе «Нарач» заканчваецца рэканструкцыя корпуса, які прастаяў пятнаццаць гадоў. Там будзе цудоўны санаторый на 500 месцаў з добрай медыцынскай базай, спартыўнай залай, басейнам. Тры паверхі новага будынка аддадзены пад лячэбныя кабінеты, у якіх устаноўлена сучаснае медыцынскае абсталяванне. Пэўны аб’ём работы належыць выканаць у санаторыі «Нарач»…
Словы падзякі накіраваў прафсаюзны лідар будаўнікам, якія займаліся рэканструкцыяй корпуса, добраўпарадкаваннем тэрыторыі. Асабліва членам будаўнічай арганізацыі «Гарант якасці». Шчырую падзяку і добрыя пажаданні адрасаваў прамоўца працоўнаму калектыву санаторыя, адпачываючым.
Хачу зазначыць, што ўсе госці, якія прыехалі на свята, прывезлі падарункі. Іх можна было ўбачыць у фае корпуса. А вось старшыня Федэрацыі прафсаюзаў Беларусі асабліва парадаваў гаспадароў. Ён падараваў уборачную машыну «МУ-320», якая зманціравана на базе трактара «Беларус».
Затым слова было прадастаўлена старшыні раённага выканаўчага камітэта А. І. Даніленку, які шчыра павіншаваў калектыў з такой знамянальнай падзеяй у іх жыцці — адкрыццём пасля рэканструкцыі спальнага корпуса. Выказаў Аляксандр Іванавіч шчырыя словы падзякі Федэрацыі прафсаюзаў Беларусі і асабіста Леаніду Пятровічу Козіку за падтрымку, фінансаванне для далейшага развіцця здраўніц. Звяртаючыся да прысутных,
А. І. Даніленка падкрэсліў:
— Калі ў вас з’явяцца дзелавыя прапановы і вы жадаеце рэалізаваць інвестыцыйны праект на Нарачанскай зямлі, калі ласка. У зручны для вас час мы заўсёды гатовы разгледзець вашы прапановы.
Аляксандр Іванавіч таксама запрасіў прысутных часцей наведвацца ў наш край, каб адпачыць, умацаваць здароўе, падзяліцца сваім вопытам, штосьці пераняць у нас. Калектыву санаторыя ён пажадаў поспехаў і квітнення.
Цёплыя словы падзякі ў адрас старшыні Федэрацыі прафсаюзаў Беларусі Л. П. Козіка адрасаваў у сваім выступленні галоўны ўрач здраўніцы Л. У. Кісель.
— Сёння адкрываем не проста спальны корпус, а абноўлены санаторый, — зазначыў Леанід Уладзіміравіч. — Бо паралельна з развіццём матэрыяльна-тэхнічнай базы здраўніцы развівалася і ўмацоўвалася яе медыцынская частка, за што шчырая падзяка генеральнаму дырэктару рэспубліканскага санаторна-курортнага аб’яднання «Белпрафсаюзкурорт» Анатолію Юр’евічу Васкевічу. Мы заўсёды знаходзім разуменне і падтрымку раённай выканаўчай улады на чале з Аляксандрам Іванавічам Даніленкам.
Цікавымі былі выступленні генеральнага дырэктара санаторна-курортнага ўнітарнага прадпрыемства «Белпрафсаюзкурорт» А. Ю. Васкевіча, дырэктара будаўнічай арганізацыі «Гарант якасці» М. У. Падабеда і іншых прамоўцаў.
Наступае самы адказны момант. Неабходна перарэзаць чырвоную стужку. Выканаць гэту ганаровую місію даручаецца старшыням Федэра-
цыі прафсаюзаў Беларусі Л. П. Ко-
зіку, райвыканкама А. І. Даніленку і генеральнаму дырэктару санаторна-курортнага ўнітарнага прадпрыемства «Белпрафсаюзкурорт» А. Ю. Васкевічу.
Ёсць такое народнае паданне, каб у доме была весялосць, узаемапавага, парадак, пяшчота, першым патрэбна пусціць ката ці кінуць клубок нітак. Вось і вядучая, перш чым запрасіць гасцей у корпус, кінула клубок нітак, каб каціўся ў «чырвоны» куток, каб сюды спяшаліся людзі з усёй нашай краіны, блізкага і далёкага замежжа.
Госці з задавальненнем агледзелі нумары. Уразілі іх сучасная мэбля, утульнасць і прастора. Тут створаны добрыя ўмовы для адпачынку. Далёка не кожная здраўніца можа пахваліцца падобнымі нумарамі.
Ігнат ЛУБНЕЎСКІ.
На здымках: 1. Пераразаюць чырвоную стужку старшыні Федэрацыі прафсаюзаў Беларусі
Л. П. Козік, райвыканкама А. І. Даніленка і генеральны дырэктар санаторна-курортнага ўнітарнага прадпрыемства «Белпрафсаюзкурорт» А. Ю. Васкевіч; 2. Госці ўрачыстасці.
Фота Таццяны Несцярэнка.