Як сфера культуры раёна будзе развівацца ў бліжэйшы час

435

Якія актуальныя пытанні развіцця сферы культуры на бліжэйшыя год-другі? Пра гэта расказаў начальнік аддзела ідэалагічнай работы, культуры і па справах моладзі райвыканкама Вячаслаў Клімовіч.

— Вялікую справу зробім, калі абуладкуем на базе Нарацкага цэнтра культуры і вольнага часу тэатральную гасцёўню народнай артысткі Беларусі Марыі Захарэвіч, якая днямі адзначана высокай узнагародай — ордэнам Францыска Скарыны. Пачатак ужо зроблены: набылі шкляныя вітрыны, піяніна, зараз вядзём збор інфармацыі і экспанатаў для выставы.

І наогул, на базе свабоднага будынка па вуліцы Ленінскай курортнага пасёлка, які знаходзіцца амаль побач, мэтазгодна стварыць вучэбна-метадычны цэнтр для абмену вопытам і азнаямлення з творчай дзейнасцю вядучых аматарскіх калектываў сталічнай вобласці і рэспублікі. Ды і выступаць ім у нас ёсць дзе: амфітэатр у Мядзеле, зялёны тэатр у курортным пасёлку… Канечне, бу­дзем і надалей пашыраць “асартымент” культурна-масавых мерапрыемстваў, умацоўваць матэрыяльна-тэхнічную базу нашых устаноў, праводзіць сучасныя рамонты, папаўняць кніжны фонд, набываць неабходнае абсталяванне і музычныя інструменты.

Плануем таксама абзавесціся перасоўным шматфункцыянальным мабільным культурным комплексам для абслугоў­вання аддаленых населеных пунктаў раёна. Карацей кажучы, прагнозы для нашай культуры самыя светлыя. Мы беражліва захоўваем усё тое добрае, што зрабілі ў гэтай галіне нашы папярэднікі, і з кожным годам прымнажаем цудоўныя набыткі ў інтарэсах жыхароў Нарачанскага краю.

Цалкам матэрыял чытайце ў нумары «Нарачанскай зары» за 17.06