У другі раз нацыянальны дзіцячы адукацыйна-аздараўленчы цэнтр «Зубраня» сабраў моладзь з краін СНД — на днях тут праходзіў міжнародны форум «Сяброўства без межаў». Прынялі ўдзел у ім дэлегацыі з васьмі краін: Арменіі, Азербайджана, Казахстана, Кыргызстана, Расіі, Малдовы, Таджыкістана і, зразумела, Беларусі. Гэта былі лідэры маладзёжных грамадскіх аб’яднанняў, арганізатары і ўдзельнікі розных акцый і мерапрыемстваў…
— У першую чаргу, форум створаны для таго, каб людзі з розных краін змаглі ўбачыць адзін аднаго, паказаць сябе, — расказвае метадыст «Зубраняці» Кацярына Гаўрыловіч. — Ён павінен дапамагчы знішчыць міжкультурныя бар’еры, каб людзі нават праз межы маглі працягнуць руку сяброўства адзін аднаму.
Дні, праведзеныя на Мядзельшчыне, былі напоўнены для юнакоў і дзяўчат адметнымі падзеямі.
— Лічу, што самым запамінальным мерапрыемствам стала сустрэча з міністрам адукацыі Рэспублікі Беларусь Аляксандрам Радзьковым, — працягвае Кацярына Гаўрыловіч.- Адбылася яна не ў зусім звычайнай форме: ля вогнішча, у сяброўскім коле абмеркавалі пытанні адукацыі, маладзёжнай палітыкі. Яшчэ праводзіліся цікавыя заняткі ў «Школе лідэра» з удзелам гасцей з рэспубліканскага інстытута вышэйшай школы, упраўлення па справах моладзі, сацыяльнай маладзёжнай службы, грамадскіх аб’яднанняў. Адбываліся іншыя мерапрыемствы. Думаю, што госці Беларусі адгукнуцца з цеплынёй пра экскурсіі, падчас якіх яны палюбаваліся культурнымі і гістарычнымі славутасцямі нашай краіны.
А каб моладзь магла больш даведацца пра іншыя дзяржавы, удзельнікі форуму наладжвалі прэзентацыі сваіх краін. Рабілі яны гэта самымі разнастайнымі спосабамі — з дапамогай фільмаў, песень, танцаў, майстар-класаў, гульняў, казак, расказаў пра славутасці дзяржаў.
Застаецца дадаць, што прайшоў форум пры падтрымцы Міждзяржаўнага фонду гуманітарнага супрацоўніцтва дзяржаў-удзельніц СНД.
Аляксандр ВЫСОЦКІ.