Конкурс прафесійнага майстэрства «Лепшы малады супрацоўнік падраздзяленняў па надзвычайных сітуацыях Мядзельскага раёна» прайшоў у мінулы аўторак на базе пажарнай аварыйна-выратавальнай часці к. п. Нарач. Яго арганізатарамі сталі таксама аддзел па справах моладзі райвыканкама і РК ГА «БРСМ» .
Пра тое, што павінна адбыцца тут у гэты дзень, расказаў намеснік начальніка РАНС А. А. Матняк:
— Праграма конкурсу складзена з чатырох практыкаванняў. Напачатку трэба, не марудзячы, падняцца па аўтамабільнай лесвіцы на чацвёрты паверх вучэбнай вежы, другі этап — адзяванне, таксама на хуткасць, баявой вопраткі і амуніцыі, затым — дэманстрацыя баявога разгортвання (падача
аднаго ствала «Б» на два рукавы). І фінальны акорд — пераадольванне паласы псіхалагічнай падрыхтоўкі з агнявымі і дымавымі завесамі. Гэта, бадай, самы эмацыянальны від! Удзельнічаюць у спаборніцтве прадстаўнікі сямі падраздзяленняў: пажарных часцей і пажарна-выратавальных пастоў. Сёлета ўпершыню такое мерапрыемства праводзім сумесна з аддзелам па справах моладзі і грамадскім аб’яднаннем «БРСМ». І думаю, што гэта супрацоўніцтва стане пачаткам добрай традыцыі.
Адразу зазначу, вельмі цікава было паназіраць за спаборніцтвамі. Некаторыя проста здзівілі сваім спрытам, уменнем сканцэнтравацца для выканання пастаўленай задачы. Менавіта так і неабходна дзейнічаць у «баявой» абстаноўцы! Калі перад стартам нехта прапанаваў для большай «аб’ектыўнасці» дазволіць удзельніку дзве спробы пры выкананні практыкавання, судзейская калегія ўсё ж не пагадзілася. Бо, як вядома, у рэальнай сітуацыі будзе толькі адзіная магчымасць выправіць становішча!
Напачатку лідарства захапіў С. С. Трапачоў, які прадстаўляў пажарна-выратавальны пост вёскі Нарач. Каб пераадолець лесвіцу, яму спатрэбілася ўсяго 9,1 секунды — некаторыя яго сапернікі патрацілі ўдвая больш! Яно і не дзіўна. У свой час Сяргей закончыў Салігорскі дзяржаўны горна-хімічны тэхнікум, дзе прафесійна абучаўся гэтай справе. Але, як паказаў конкурс, непасрэдна на месцах таксама «куюцца» нядрэнныя кадры. Гаспадар «пляцоўкі» У. С. Баркоўскі вызначыўся ў трох астатніх відах праграмы. Сімвалічна, што менавіта на паласе псіхалагічнай падрыхтоўкі, праявіўшы сілу волі, Уладзімір канчаткова схіліў чашу вагаў на сваю карысць. І атрымаў, такім чынам, па выніках усіх этапаў агульную перамогу.
С. С. Трапачоў заняў другое месца і трэцім стаў Аляксандр Баброўка — зноў жа баец пажарнай аварыйна-выратавальнай часці к. п. Нарач, якую ўзначальвае вопытны В. В. Хімарода.
Пераможца і прызёры атрымалі граматы і каштоўныя падарункі, будуць таксама прэміраваны за ўдзел у конкурсе ўсе яго ўдзельнікі.
Аляксандр БЫКАЎ.
Фота Таццяны Несцярэнкі.