А за лічбамі — жыццё!

Начальнік раённага аддзела статыстыкі С. Р. Літвіновіч на пытанне пра каго можна было б расказаць у газеце напярэдадні іх прафесійнага свята без ваганняў назваў проз­віш­ча І. А. Несцяровіч.

— Яна, лічыце, усё жыццё адпрацавала ў гэтай сферы, -сказаў Святаслаў Рыгоравіч. — І адпрацавала добрасумленна. Два гады таму пайшла на заслужаны адпачынак, але па-ранейшаму верна служыць абранай справе. Цяпер з’яўляецца вядучым спецыялістам ад­дзела.

Сама Ірына Аляк­сандраўна расказвае пра  сябе сціп­ла. Родам яна з Мін­скага раёна (вёска Пяцеўшчына), пасля заканчэння тагачаснага Беларускага дзяржаўнага інстытута народнай гаспадаркі патрапіла па мэтавым накіраванні на Мядзельшчыну. Тут і замуж выйшла, пусціла, як кажуць, карані. Днямі споўніцца 35 год, як працуе яна ў раённым аддзеле статыстыкі. Стаж, пага­дзіцеся, немалы.

— Не надакучыла? — пытаюся. — Перад вачамі адны сухія лічбы справаздач…

— Гэта толькі на першы пог­ляд, — запярэчыла жанчына. — Лічу, што статыстыка — прафесія вельмі цікавая, бо за тымі ж лічбамі — усё жыццё раёна, людзі, вынікі іх працы. Да таго ж, трэба мець юрыдычныя і эканамічныя веды, бо ўнікаць даводзіцца ў самыя розныя сферы народнай гаспадаркі.

— Ірына Аляксандраўна, — працягваю размову, — шмат чаго змянілася ў раёне, з таго часу як вы зрабілі першыя крокі ў абранай прафесіі. Гэта якраз і адлюстроўваецца ў сённяшніх лічбах. А што можна сказаць пра саму работу статыстыка?

— Вядома ж, час патрабуе новых падыходаў у любой сферы, і мы тут  не выключэнне. Пастаянна працуем са сваімі рэспандэнтамі: право­дзім вучобу, гутаркі па ўзнікаючых пытаннях. Канечне, камп’ютарызацыя значна аблегчыла вя­дзенне справы, ды і колькасць справаздач зменшылася. Раней, напрыклад, у хо­дзе пасяўной ці ўборачнай даво­дзілася фактычна штотыдзень збіраць адпаведныя лічбы. А цяпер раз у месяц дастаткова. Але заўважу, што камп’ютар дапамагае толькі ў «матэматычнай» частцы работы. А, здараецца, каб не дапусціць памыл­кі, патрабуецца і логіку ўключаць. Вось тут якраз вопытны спецыяліст проста незаменны! І прыемна ўсведамляць, што давялося шмат каму дапамагчы авалодаць як след гэтай прафесіяй, набіць, як кажуць, руку.

Мы развіталіся, і І. А. Несцяровіч паспяшалася да рабочага стала. Лічбы чакаць не будуць!

Аляксандр БЫКАЎ.

На здымку: І. А. Несцяровіч.

Фота Таццяны Несцярэнкі.