На гэтых выхадных Камарова стала прыцягальным месцам для майстроў з усёй Беларусі — тут праходзіла V рэспубліканская выстава-кірмаш народных рамёстваў і промыслаў. Арганізатарамі свята «Камарова — кола дзён» выступілі ўпраўленне прадпрымальніцтва і ліцэнзавання камітэта эканомікі аблвыканкама, райвыканкам, мясцовы цэнтр развіцця сельскага прадпрымальніцтва. У суботу ў вёску прыехала больш за 130 майстроў з розных куткоў краіны: і з адносна блізкіх Паставаў, Глыбокага, Валожына, Маладзечна і далёкіх — Магілёва, Бабруйска… Як ніколі, прадстаўнічая была дэлегацыя Мядзельшчыны: разнастайныя вырабы прывезлі ўмельцы з Крывічоў, вёскі і к. п. Нарач, Дзягіляў, Сватак, Лотвы, ды і камароўскія людзі да іх далучыліся. Вось Яніна Іванаўна Лапато з вёскі Нарач прадставіла свае вырабы — фларыстыку. Праўда, пагаварыць з ёй доўга не ўдалося — тут якраз чарговая наведвальніца зацікавілася створаным рукамі майстрыхі цудоўным букетам.
Перад урачыстым адкрыццём свята гледачоў чакала выступленне духавога аркестра Смаргонскай пагранічнай групы. Атрымалася сапраўднае шоу — настолькі ярка і зладжана выступалі пагранічнікі.
Пасля ўступных слоў вядучых Ганны Казакевіч і Івана Нехвядовіча ўсіх прывітаў старшыня райвыканкама Аляксандр Даніленка.
— Сёння ў Камарове сабраліся унікальныя творчыя людзі, якія праслаўляюць Мядзельшчыну і ўсю Беларусь, — адзначыў Аляксандр Іванавіч. — Тут ёсць у каго павучыцца, пераняць творчы вопыт. Упэўнены, што з кожным годам свята будзе ўсё лепшае і багацейшае.
Намеснік старшыні аблвыканкама Аляксандр Валяр’янавіч Ермак пажадаў, каб кірмаш толькі развіваўся, а ўдзельнікаў і гасцей станавілася ўсё больш і больш.
Аднак, вернемся да выставы. Многія майстры прыязджаюць у Камарова не ўпершыню, як, напрыклад, Вітольд Малютка з Валожына.
— Калі прыехалі зноў, значыць, спадабалася ў мінулы раз? — цікаўлюся.
— Зразумела, якія могуць быць пытанні. Спадабалася, што тут утульна, пекна, людзі харошыя. Яны цікавяцца гэтай прыгажосцю. Ну як жа не прыехаць?!
І якіх толькі вырабаў не было на свяце: вабілі позірк арыгінальная кераміка, вытанчаная разьба па дрэве, залацістая саломка, гнуткая лаза… Дзівіліся на гэта хараство і расіяне, якія адпачываюць у нарачанскіх здраўніцах. Яны не толькі актыўна набывалі сувеніры, але і вучыліся, як ствараць гарлачыкі ў майстра Сяргея Шчэрбы.
Многія затрымліваліся ля дзівосных карцін Юрыя Адамовіча з Мінска: спалучэнне металу і дрэва нарадзіла цудоўныя, ні на якія непадобныя рэчы.
— Гэта змешаная тэхніка: разное дрэва і халодная ручная чаканка па метале, — тлумачыць аўтар. — У дзяцінстве шмат маляваў, потым навучылі працаваць з металам, выразаць з дрэва. Вырашыў гэта сумясціць.
Кажа майстар, што яго карціны бралі на падарункі для вядомых людзей на постсавецкай прасторы. Але лічыць, што лепш, хай карціны дастаюцца простым людзям — яны іх будуць больш цаніць і берагчы.
Словам, тыя, хто пабываў на свяце, проста не маглі паехаць адтуль з пустымі рукамі.
— А можа і добра, што няшмат грошай з сабой браў, — разважаў адзін з гасцей. — А то хочацца купіць многае: усе б грошы растраціў на такую прыгажосць.
Сёлета ў Камарова прыехалі не толькі народныя майстры. Знаёмілі са сваёй прадукцыяй прадпрыемства «ЭкаДомБуд» з Занарачы, раённы камбінат бытавога абслугоўвання, фабрыкі мастацкіх вырабаў з розных куткоў краіны.
Асаблівасцю свята было тое, што, апроч народных рамёстваў, акцэнт рабіўся яшчэ і на турызм. Так, з турыстычным патэнцыялам Міншчыны знаёмілі прадстаўнікі абласнога ўпраўлення фізкультуры, спорту і турызму. Краязнаўчую літаратуру прадэманстравала выдавецтва «Рыфтур».
Шмат у гэтым годзе размясцілася гандлёвых кропак: паспрабаваць можна было не толькі стандартны для розных святаў набор з шашлыка, піцы і г. д., але і бліны, курыцу-грыль ды іншыя прысмакі. І пры тым, аформілі гандлёвыя месцы арыгінальна.
Адно шкада, што падвяло надвор’е. Дождж сапсаваў настрой майстрам і гасцям, скарэкціраваў планы арганізатараў. Але перачакаўшы непагадзь, кірмаш працягнуўся, хай і не ў такім маштабе. Прадоўжылася і канцэртная праграма. Паміж артыстаў з Мядзельшчыны, Валожына выступіў і танцавальна-фальклорны калектыў з Латвіі. Вось так, камароўскае свята пакрысе выходзіць на міжнародны ўзровень.
Працягнуўся кірмаш і назаўтра. Засталіся некаторыя майстры, пад’язджалі і аўтобусы з адпачываючымі са здраўніц — каб зноў павезці з сабою сувеніры з камароўскага свята.
Аляксандр ВЫСОЦКІ.