Радасць перамог

У гімне ДУА «Цэнтр дзіцячай творчасці дзяцей і моладзі» ёсць радкі, што адлюстроўваюць стан дзіцяці, які першы раз пераступае парог гэтай установы:

«Зусім няўмейкай сюды ты прыйшоў,

І боязна крыху, і тахкае сэрца.

Хвілінка праходзіць -сябе ты знайшоў:

І спорыцца праца, і тчэцца ўмельства».

Гэтыя словы тычацца многіх дзяцей, якія прыходзяць сюды, каб спачатку паглядзець на работы сваіх аднагодкаў, а потым і самім стаць сапраўднымі творцамі. Менавіта творцамі, бо калектыў педагогаў установы дадатковай адукацыі, настаўнікі, якія вядуць заняткі ў гуртках на базе школ, робяць усё магчымае, каб раскрыць талент кожнага дзіцяці. І малень­кія рукі пачынаюць ствараць сапраўдныя шэдэўры… Я ні­коль­кі не памылілася, назваўшы дзі­ця­чыя працы шэдэўра­мі. Пра гэта  гавораць і вынікі абласной выставы, якая ла­дзіцца штогод і з якой нашы навучэнцы вяртаюцца з узнагародамі.

Ураджайнай выдалася і сёлетняя абласная выстава, якая называлася «Скарбонка талентаў». 10 дыпломаў  атрымалі  навучэнцы розных гурткоў. Дыпломамі I ступені адзначаны дзве работы. У тым ліку «Дрэва шчасця» Аляксандры Балін­скай (гурток «Папяровыя фантазіі»). Работа, выкананая ў тэхніцы «кві­лінг», прыцягвае ўвагу задумай і акуратнасцю. Бадай, самай маленькай
удзельніцай гэтай выставы стала шасцігадовая Марыя Новак. Яе ўмелыя ручкі стварылі з салёнага цеста непаўторную карціну каляднай ночы.

Дыпломамі II ступені ўзнагароджана шэсць гурткоўцаў. Працы выкананы ў рознай тэхніцы, маюць адмысловыя сюжэты. Ілля Субач ужо не першы год наведвае гурток «Разьба па дрэве». У сваёй рабоце «Хлебароб» хлопчык паказаў сябе сапраўдным разьбяром, дасканала валодаючым інструментам і маючым мастацкі густ. Журы высока ацаніла твор Юліі Мялешка, навучэнкі гім­назіі-інтэрната г. Мядзел. Трыпціх, выкананы ў тэхніцы «выцінанка» і названы «Навагодні настрой», адлюстроўвае і прыгажосць зі­мы, і навагодні каларыт, і, несумненна, вясёлы настрой самой дзяўчынкі. Працавітасць і стараннасць Алі­ны Уліцкай, якая другі год наведвае гурток «Чароўная стужка», прынесла свой плён. Работа, якая была прадстаўлена на выставе, радавала і гледачоў, і журы цеплынёй фарбаў, нездарма яна і называлася адпаведна — «Кветкі для мамы». Дзіяна Кайко, нягледзячы на невялікі ўзрост і на тое, што ўсяго толькі першы год наведвае гурток «Салёнае цеста», зрабіла прыгожую вазу і аздобіла яе гароднінай і садавінай. Атрымаўся эксклюзіўны твор, які таксама выклікаў у членаў журы станоўчыя эмоцыі.

Здавалася, ну які шэдэўр можна стварыць пруткамі і шыдэлкам: звязаць адмысловую сур­вэтку альбо што-небудзь непаўторнае з вопраткі? А вось Ганна Мялешка, вучаніца ДУА «СШ №2 г. Мядзел», звязала шашкі. Несумненна, згуляць імі пар­тыю захочацца не толь­кі малышам, але і нам, дарослым. Ды і як жа інакш, калі папасці ў дамкі спяшаюцца божыя кароўкі, а на шляху да перамогі іх сустракаюць прыгожыя блакітныя кветкі. Ды і само поле прыварожвае ігракоў, бо яно таксама звязана пруткамі. Творчым падыходам, арыгінальнасцю заўсёды адрозніваюцца працы
вучняў ДУА «Занарацкая СШ». Вось і на сёлетнюю выставу Лізавета Купрэева прадставіла работу пад назвай «Мы заўсёды побач», якую выканала ў тэхніцы «тэкстыль, барэльефная лялька». Дыплом II ступені — вынік стараннасці дзяўчынкі.

Не меншую цікавасць уяўляюць работы, якія адзначаны дыпломамі III ступені. Арцём Зарэцкі, які з задавальненнем наведвае гурток «Батык», выканаў «Восеньскі нацюрморт». У новай тэхніцы «малюнак пяском» была прадстаўлена праца вучняў ДУА «Слабодская СШ» Аліны і Дзмітрыя Крыўко «Божае нараджэнне», якая таксама ўдас­тоена ўзнагароды.

Засталося  назваць педагогаў дадатковай адукацыі, якія дапамаглі вучням дасягнуць пэўных перамог. Гэта Алена Ула­дзіміраўна Зайцава, Марына Уладзіміраўна Новак, Аляксандр Паўлавіч Ждан, Святлана Рыгораўна Глазко, Алена Уладзіміраўна Ардынец, Ала Канстанцінаўна Кот, Антаніна Пятроўна Крыўко.

Я. ЧАРНЯЎСКАЯ.

Намеснік дырэктара па вучэбна-выхаваўчай рабоце ДУА «Цэнтр дзіцячай творчасці».