Да 110-годдзя Максіма Танка. У Мядзеле прайшла Рэспубліканская навукова-практычная канферэнцыя

«Вызначальная рыса творчасці Максіма Танка — гэта грамадзянскі пафас і адданасць беларускаму народу. Ужо ў ранніх вершах гэта было жыццёвае крэда паэта. «Ты чуеш, брат» — гэта 1930 год. Ён выступіў як змагар, заклікаўшы беларусаў да аб’яднання ў адзіны народ», — гаварыў падчас адкрыцця канферэнцыі дырэктар Інстытута літаратуразнаўства імя Янкі Купалы Нацыянальнай акадэмііі навук Беларусі Іван Саверчанка.

* * *

Сёння, 17 верасня, у Мядзеле адбылася Рэспубліканская навукова-практычная канферэнцыя «Шчаслівы, што пяю цябе, Радзіма», прысвечаная 110-годдзю з дня нараджэння Максіма Танка. Адкрылі яе ў раённым Цэнтры культуры дырэктар Інстытута літаратуразнаўства імя Янкі Купалы Нацыянальнай акадэмііі навук Рэспублікі Беларусь Іван Саверчанка і намеснік старшыні райвыканкама Вольга Габрусенак.

На сцэну выйшаў народны хор аматараў песні «Верасень».

Пасля ўрачыстага адкрыцця канферэнцыі яе ўдзельнікі перайшлі ў актавую залу гімназіі.

Пра што былі даклады? Пра творчасць і асобу Максіма Танка, пра малавядомыя факты яго біяграфіі. Пра тое, як рыхтаваўся поўны збор твораў паэта і як яго вершы ўплываюць на творчасць сучаснікаў. Сярод дакладчыкаў — Іван Саверчанка, дырэктар цэнтральнай раённай бібліятэкі імя Максіма Танка Таццяна Нырцова, кандыдат філалагічных навук Анатоль Верабей, паэт і даследчык танкаўскай творчасці Леанід Дранько-Майсюк, прафесар Святлана Калядка, літаратуразнаўца Таццяна Барысюк, паэтка Вольга Нікіценка, галоўны рэдактар выдавецтва мастацкая літаратура і часопіса «Полымя» Віктар Шніп, кандыдат філалагічных навук Мікалай Мікуліч. Успамінамі пра паэта падзялілася сваячка Максіма Танка Ганна Кузюковіч — яе бабуля была роднай сястрой жонкі паэта.

Падрабязнасці — у бліжэйшым нумары газеты.