Яйкі… як гарачыя піражкі!

І насамрэч “дэбютная” прадукцыя Мядзельскага ПМС у сераду расходзілася не горш за свежую выпечку. Менавіта пазаўчора вытворцы зрабілі спробны крок у масы і з машыны ў цэнтры горада распрадалі першыя тысячы выгалавіцкіх яек. І трэба сказаць, зрабілі гэта з такой лёгкасцю, што асобным прадпрымальнікам заставалася толькі зайздросціць! У чым жа сакрэт?

Па-першае, кошт дзясятка сярэднестатыстычных С-2 складае ўсяго 1 рубель 75 капеек (пагадзіцеся, у нашым горадзе — гэта мінімум). Па-другое, свая камізэлька заўсёды бліжэй да цела — нават медыкі раяць ужываць прадукцыю з мясцовых шыротаў (у нашым выпадку — ледзь не з уласнага падворка: колькі да тых Выгалавічаў!). А яшчэ, верце ці не, а першая пакупніца як у ваду глядзела — сказала: “Справа пойдзе! У мяне рука лёгкая…”. І справа насамрэч пайшла. Мядзяльчане бралі па семдзесят, сорак, трыццаць яек. У канцы чаргі з хваляваннем ўдакладнялі — ці ўсім хопіць. Хаця перажываць не было чаго. На свой першы прылавак супрацоўнікі ПМС хоць і выставілі пад тры тысячы яек — у выпадку неабходнасці абяцалі прывезці дадатковую партыю.

— Як бачыце, попыт на нашу прадукцыю ёсць, — заўважае загадчыца склада прадпрыемства меліярацыйных сістэм, а ў сераду па сумяшчальніцтву прадавец Таццяна Урбшас. — Пры гэтым інфармацыя наконт сённяшняга продажу прайшла ў асноўным па сродках “сарафаннага радыё”. А што ж будзе, калі мы заявім пра сябе ў поўны голас!

Дарэчы, у канкурэнтаздольнасці мясцовай прадукцыі зусім хутка змогуць пераканацца не толькі жыхары Мядзела, але і буйнейшых вёсак раёна. Ужо сёння ніжэй друкуем рэкламу з графікам продажу выгалавіцкай прадукцыі па населеных пунктах азёрнага краю. У той жа час яйкі можна будзе набыць у крамах райспажыўтаварыства і сеткі “Еўраопт”, на рынках у райцэнтры і вёсцы Нарач. І гэта яшчэ не ўсё. Вытворцы збіраюцца выходзіць за межы раёна, і ў тую ж стартавую сераду першая партыя выгалавіцкіх яек была экспартавана ў Маладзечна.

— У перспектыўнасці распачатай справы няма аніякіх сумненняў, — зазначае спецыяліст па маркетынгу ДУП “Мядзельскае ПМС” Сяргей Казакевіч. — Яйкі насамрэч добрыя, іх высокую якасць першымі пацвердзілі супрацоўнікі нашага ж прадпрыемства. Пры гэтым распачынаем, як бачыце, з С-2, але з часам абавязкова выйдзем на СО. Яшчэ трэба адзначыць, што наша прадукцыя экалагічна чыстая  — у рацыёне курэй аніякіх штучных кармоў. Ды і што тут крывіць душой маркетолага: яйкі — рэч штодзённага ўжытку, таму на што, як не на іх, ставіць такія высокія стаўкі!

P. S. У сераду вытворцы дэбютавалі яшчэ ў курортным пасёлку Нарач. І там таксама аншлаг!

На здымку: у райцэнтры выгалавіцкую прадукцыю прэзентавалі вадзіцель прадпрыемства меліярацыйных сістэм Дзмітрый Ермаковіч і загадчыца склада Таццяна Урбшас.

Фота Аляксандра Высоцкага.