Кватэра кожнага чалавека літаральна насычана зараз разнастайнымі электроннымі прыборамі. І па-ранейшаму галоўную ролю адыгрывае тэлевізар. Мы карыстаемся ім кожны дзень, а калі раптам выходзіць са строю — настрой адразу псуецца: ні любімага серыяла паглядзець, ні навін пачуць. Бо той жа камп’ютар на сёння яшчэ не ў кожнага, тым больш у вёсцы.
Карацей, без «тэлелекара» па-ранейшаму не абысціся. Ёсць такі ў вёсцы Нарач — індывідуальны прадпрымальнік П. Э. Дунец. Вязуць яму апараты з усіх куткоў раёна, пачынаючы ад Свіры і заканчваючы Крывічамі.
— Чаму менавіта Нарач аказалася цэнтрам аказання такіх паслуг? — пытаюся.
— Ды проста я тут жыву! — адказвае Пётр Эдвардавіч. — Вырашыў заняцца ўласнай справай пасля таго, як у чэрвені мінулага года зачынілася майстэрня ў Мядзеле, дзе я адпрацаваў 16 год. А пачынаў асвойваць гэту прафесію ў Паставах у 1994 годзе пасля заканчэння віцебскага прафтэхвучылішча.
— Ці хапае заказаў? Наколькі ведаю, пакуль асаблівых канкурэнтаў у вас няма…
— Сапраўды, калі гаварыць пра рамонт у стацыянарных умовах, я тут адзін. Прымаю тэлевізары любых мадэлей, акрамя лямпавых. Ды іх ужо практычна нідзе не засталося. Заключыў таксама адпаведныя дагаворы з нарачанскімі здраўніцамі. Так што, заказаў хапае. Акрамя гэтага, рамантую, калі ёсць час, DVD, музычныя цэнтры. А што тычыцца канкурэнцыі, адкажу так: у людзей цяпер шмат рознай апаратуры, і калі з’явіцца ў гэтай сферы яшчэ нехта — работы хопіць і яму. Галоўнае, працаваць так, каб кліент застаўся задаволеным.
— У вас назапашаны немалы вопыт. Тым не менш, бываюць, напэўна, і няпростыя выпадкі…
— Зразумела, тэхніка ёсць тэхніка. Здараецца, нямала трэба паламаць галаву, каб адшукаць прычыну паломкі. Гэтым летам, напрыклад, некалькі тэлевізараў паступіла, якія выйшлі са строю пасля ўдару маланкі. Такія выпадкі, бадай, самыя складаныя.
Падчас нашай гутаркі завітала ў майстэрню жанчына з вёскі Занарач, каб параіцца, што рабіць з тэлевізарам — прапаў на экране нармальны колер. П. Э. Дунец выязным рамонтам не займаецца, але, уважліва выслухаўшы, паабяцаў жанчыне: як будзе ў тым баку, абавязкова зойдзе і паглядзіць у чым прычына. Што ж, падыход да кліента правільны!
Дарэчы, Пётр Эдвардавіч «рэаніміраваў» сёлета і мой чорна-белы «Віцязь», які ўжо збіраўся выкінуць на сметнік. Цяпер будзе дажываць свой век на кухні!
Аляксандр БЫКАЎ.
На здымку: за работай тэлемайстар
П. Э. Дунец.