Прошла августовская районная конференция педагогических работников

У Нарацкай сярэдняй школе №2 сёння прайшла жнівеньская педагагічная канферэнцыя работнікаў раёна. У фае дзейнічалі тэматычныя выставы, якія знаёмілі ўдзельнікаў і гасцей з дасягненнямі педагагічнай супольнасці раёна.

Прывітаў удзельнікаў канферэнцыі старшыня раённага выканаўчага камітэта Аляксандр Прановіч:

– Прыемна, што ў апошнія гады сістэма адукацыі нашага раёна знаходзіцца сярод лідараў на ўзроўні вобласці, – адзначыў ён. – Пра якасць адукацыі сведчаць дасягненні вучняў у інтэлектуальных, спартыўных, творчых спаборніцтвах і конкурсах. Вы прыкладаеце максімум намаганняў для таго, каб нашы дзеці раслі здаровымі і паспяховымі, здольнымі ствараць моцныя сем’і, выхоўваць дзяцей і быць карыснымі сваёй краіне,

Аляксандр Прановіч правёў урачыстую цырымонію ўзнагароджвання лепшых педагогаў раёна. За добрасумленную і плённую працу, дасягнутыя поспехі ў навучанні і выхаванні падрастаючага пакалення граматай Міністэрства адукацыі Рэспублікі Беларусь узнагароджаны настаўніца Нарацкай сярэдняй школы №2 Марына Федзічкіна і настаўніца Нарацкай сярэдняй школы №1 Жанна Куцкевіч. Ганаровай граматай галоўнага ўпраўлення па адукацыі Мінскага абласнога выканаўчага камітэта адзначаны намеснік дырэктара па выхаваўчай рабоце гімназіі Мядзела Аксана Міхневіч, настаўніца пачатковых класаў Занарацкай СШ Аксана Рослік, дырэктар Нарацкай сярэдняй школы №1 Алена Сівец і загадчык дзіцячага сада аграгарадка Княгінін Святлана Шырко.

Падзякай старшыні раённага выканаўчага камітэта адзначаны настаўніца матэматыкі і інфарматыкі Ала Кумішча і настаўніца беларускай мовы і літаратуры Алена Сурвіла са Старлыгскай сярэдняй школы імя Івана Аніські, настаўніца хіміі Анастасія Кумішча і беларускай мовы і літаратуры Сафія Байко з Нарацкай сярэдняй школы №2, настаўніца гісторыі гімназіі Мядзела Вольга Рудак і кіраўнік цэнтра па забеспячэнню дзейнасці бюджэтных арганізацый Аляксей Балюк.

Старшыня Мінскай абласной арганізацыі прафсаюза работнікаў адукацыі і навукі Таццяна Апраніч выказала шчырыя словы падзякі ветэранам педагагічнай працы. Павіншавала іх, а таксама ўручыла ўзнагароды работнікам раёна.

Асаблівую ўвагу надалі маладым спецыялістам. Для іх прагучалі віншаванні і наказы, ім уручылі грашовыя сертыфікаты ад раённай арганізацыі Беларускага прафесійнага саюза работнікаў адукацыі і навукі.

З дакладам на канферэнцыі выступіла начальнік упраўлення па адукацыі, спорце і турызме раённага выканаўчага камітэта Святлана Кундра. Яна таксама ўзнагародзіла работнікаў сістэмы адукацыі раёна за іх высокі прафесіяналізм і значныя дасягненні.

Музычныя падарункі разам з педагогамі падрыхтавалі выкладчыкі і навучэнцы Мядзельскай дзіцячай школы мастацтваў.

Падрабязна чытайце ў адным з бліжэйшых нумароў «Нарачанскай зары»