Лепшае велікоднае яйка выберуць у парафіі святога Андрэя ў Нарачы

Набліжаецца Вялікдзень — час, калі сэрца напоўніцца радасцю, а душа адчувае перамогу жыцця над усімі цяжкасцямі. Гэта свята надзеі, абнаўлення і дабра, якое прыносіць у кожны дом святло і цяпло.

Творчая акцыя ў парафіі святога Андрэя

У парафіі Святога Андрэя ў Нарачы вырашылі ўпрыгожыць гэтае ўрачыстае свята асаблівай творчай акцыяй. Тут аб’яўлены конкурс на лепшае велікоднае яйка 2026 года — магчымасць не проста стварыць сапраўдны творчы шэдэўр, а ўкласці ў яго часцінку сваёй душы і перадаць гэты настрой іншым.

Ксёндз парафіі ПАВЕЛ, падкрэсліў значнасць ініцыятывы:

— Велікоднае яйка — гэта не проста ўпрыгажэнне, а глыбокі сімвал жыцця, адраджэння і перамогі дабра над злом. Ствараючы Велікоднае дрэва разам, мы перадаём каштоўнасці Веравызнання і ствараем асаблівую атмасферу супольнасці. Запрашаю ўсіх, хто хоча ўкласці крыху сваёй душы ў свята, прыняць удзел. Няхай гэты творчы працэс прынясе радасць, а вынік стане сапраўдным дарам для парафіі і ўсіх парафіянаў!

Велікоднае дрэва — цэнтр святкавання

Велікоднае дрэва стане сэрцам свята: яно будзе ўпрыгожана яйкамі, створанымі рукамі жыхароў і гасцей аграгарадка. Кожны твор — сімвал надзеі і адраджэння, выява веры і любові.

Хто можа ўдзельнічаць?

Да ўдзелу запрашаюцца ўсе — ад дзяцей да дарослых, ад пачаткоўцаў да дасведчаных майстроў. Стварайце яйка з дрэва, шкарлупіны, пенапласту, кардону. Дапаўняйце яго бісерам, фарбамі, ніткамі, аплікацыямі — дайце волю сваëй фантазіі!

Патрабаванні да твораў

Памятайце пра некалькі простых умоў:

•памер яйка павінен быць ад 7 да 15 см;

•кожнае яйка павінна мець пяцельку для вешання на Велікоднае дрэва;

•адзін удзельнік можа прадставіць ад 1 да 3 твораў — гэта дазваляе раскрыць свае ідэі поўнасцю і паказаць розныя спосабы ўспрымання свята.

Калі і куды здаваць работы?

Конкурс будзе праводзіцца да 29 сакавіка 2026 года. Работы прымае Ірына Амельяновіч.

У гэтым годзе Вялікдзень каталікі будуць святкаваць 5 красавіка