На все 100! Выпускница мядельской гимназии набрала максимальный бал на ЦТ по истории
Максімальны вынік на ЦТ па гісторыі паказала выпускніца гімназіі Таццяна ЖАЛКОЎСКАЯ. Якім быў шлях да запаветнай соткі? Спыталі.
– Мая мама па адукацыі гісторык, – здалёк пачынае Таццяна. – Зацяжарала мной, як вучылася ў педуніверсітэце імя Максіма Танка. Я была ў матулі пад сэрцам, калі яна наведвала лекцыі і здавала экзамены. Мама нават хацела назваць мяне Рагнедай у гонар полацкай князёўны. Але перадумала і дала імя ў гонар Таццяны Ларынай – гераіні пушкінскага рамана ў вершах «Яўгеній Анегін». Мама нарадзіла першай у групе. Таму яе аднакурснікі называлі мяне дзіцём гістфака. Мама працуе экскурсаводам у нацпарку. З дзяцінства я падарожнічала з ёй, слухала, што яна расказвае. Так што гісторыю люблю даўно. Вырашыла звязаць з ёй прафесію. Думала, што гісторыя – лёгкі прадмет і я яго добра ведаю. Але мама сказала, што гэта не так. І задала два пытанні: «Калі была пабудавана Нацыянальная бібліятэка?» і «Калі быў створаны Крыж Еўфрасінні Полацкай?» Адказаў я не ведала, а таму зразумела, што рыхтавацца трэба сур’ёзна. Чытала дадатковую літаратуру, якую давалі мама і настаўніца Вольга Канстанцінаўна Рудак. Пісала канспекты, перачытвала іх на перапынках. Даты запісвала на запясцях, каб лепш запомніць. Старалася часцей адказваць на ўроках. Сям’я верыла ў мяне і падтрымлівала. Напрыклад, усе разам глядзелі відэа пра гістарычных асоб.
Непасрэдна перад ЦТ я захвалявалася. Але ўбачыла прыветных педагогаў і супакоілася. А зрабіўшы першыя заданні, зразумела, што здам добра. Яны былі лёгкія, выканала ўсе хвілін за 40. Разумела, што бал будзе высокі. Але на сотню не разлічвала: мне здавалася, што ў адным заданні ўсё ж памылілася. Калі ж прыйшоў вынік, была ўражана. Скакала, крычала. Вялікі дзякуй сям’і і педагогу!
Наталля ЛІСІЦКАЯ
Фота забяспечана Таццянай ЖАЛКОЎСКАЙ