Даследаванні з Мядзельшчыны трапілі ў лік пераможцаў на рэспубліканскім конкурсе

Два звязаныя з Мядзельшчынай даследаванні трапілі ў лік пераможцаў Рэспубліканскага конкурсу навукова-даследчых работ «Васількоў шапатліваю моваю…». Адно – пра анлайн-пераклад, другое – пра народныя гаворкі.

Поспехі юных даследчыкаў у лінгвістыцы

Першае месца заняў вучань 10 класа Мядзельскай сярэдняй школы №2 Рыгор Несцяровіч. Ён прадставіў навукова-даследчую работу «Анлайн-перакладчыкі пры перакладзе з рускай мовы на беларускую».

Другое месца – у 9-класніка сярэдняй школы №120 Мінска імя Пралетарскай Маскоўска-Мінскай дывізіі Сямёна Сцяпанава. Ён таксама звязаны з Мядзельшчынай, бо яго дзядуля і бабуля жывуць у вёсцы Чарэмшыцы. Тэма работы Сямёна прысвячалася нашаму краю – «Народныя гаворкі Мядзельшчыны і іх асаблівасці».

Арганізатары і цырымонія ўручэння ўзнагарод

Конкурс «Васількоў шапатліваю моваю…» быў прымеркаваны да Міжнароднага дня роднай мовы. Да ўдзелу запрашаліся навучэнцы 9–11 класаў устаноў адукацыі, навучэнцы ўстаноў прафесійна-тэхнічнай і сярэдняй спецыяльнай адукацыі, студэнты 1–2 курсаў ВНУ. У гэтым годзе ў інтэлектуальным спаборніцтве ўдзельнічалі 350 прэтэндэнтаў. Усе работы размеркавалі па 8 тэматычных секцыях.

Конкурс арганізавалі Інстытут мовазнаўства імя Якуба Коласа Цэнтра даследаванняў беларускай культуры, мовы і літаратуры НАН Беларусі, часопіс «Роднае слова» і канал «Культура» Беларускага радыё.

Урачыстае ўзнагароджанне адбылося 18 лютага. Дыпломы і прызы пераможцам уручаў Старшыня Прэзідыума НАН Беларусі Уладзімір Каранік і іншыя. Для гасцей арганізавалі экскурсію ў музей Акадэміі навук.