«Я родилась на Нарочи, это родина моего отца…» Об истории своей семьи рассказывает мядельская гимназистка

Я нарадзілася на Нарачы, гэта радзіма майго бацькі. Яго матуля Валянціна Мікалаеўна Выхрыстава (Варанец) была карэннай жыхаркай вёскі Варанцы. А вось татаў бацька прыехаў сюды па накіраванні з Краснадарскага края. Ён – кубанскі казак, працаваў галоўным інжынерам рыбзавода. Сувязь з нашымі роднымі з Кубані мы падтрымліваем.

Мая матуля родам з Брэсцкай вобласці. Яе бацькі – цудоўныя людзі. І дзядуля, і бабуля нарадзіліся ў вялікіх сем’ях. Яны працавітыя, жыццярадасныя, я вельмі люблю гасцяваць у іх.

Гісторыяй роду цікаўлюся даўно, мы з бацькамі склалі радавод да пятага калена.

Усе мае прабабулі і прадзеды былі ўдзельнікамі Вялікай Айчыннай вайны. Не толькі вытрымалі яе выпрабаванні, але і набліжалі Перамогу. Мамін дзядуля – бацька яе таты Васіль Давыдавіч Куцко – партызаніў, потым быў на фронце, дайшоў да Берліна. Узнагароджаны ордэнам Чырвонай Зоркі, ордэнам Айчыннай вайны ІІ ступені. А другі яе дзед, Міхаіл Іванавіч Шуляк, знаходзіўся ў палоне ў Германіі, быў асуджаны да расстрэлу, змог уцячы. Вывучыў дасканала нямецкую мову, пасля вайны стаў аграномам-селекцыянерам. Яго культуры выстаўляліся на ВДНГ СССР.  Прабабуля, Ганна Анісімаўна, працавала медсястрой у ваенным шпіталі.

Татаў дзед Міхаіл Сямёнавіч сустрэў Перамогу ў Франкфурце-на-Майне, узнагароджаны ордэнам Айчыннай вайны ІІІ ступені. А вось дзядулю і бабулю па лініі татавай мамы, як і ўсіх жыхароў вёскі Варанцы, вывезлі ў працоўны лагер Нойенгаме ў Гамбургу. Яны змаглі перажыць пакуты, вярнуліся на радзіму, нарадзілі дачку (маю бабулю). Прадзед Мікалай быў брыгадзірам рыбалавецкай арцелі. Сям’я Варанцоў славілася ў Варанцах гасціннасцю, ладам.

Калі я думаю пра ўсіх гэтых людзей, у мяне займае дух ад іх годнасці, любові да жыцця. Кожны з нас адказны за свой лёс перад памяццю продкаў. Я шчаслівая быць нашчадкам менавіта гэтых людзей на зямлі…

Марта ВЫХРЫСТАВА. Фота з сямейнага альбома аўтара

На здымку: Рыбалавецкая арцель. Мікалай Лявонцьевіч Варанец – трэці справа