Валерий Масевич не представляет своей жизни без земли и техники

Валерый МАСЕВІЧ – механізатар са стажам. Увесь час працуе ў адной гаспадарцы. Мяняліся толькі яе назвы. А вось адносіны да хлебаробскай справы заўсёды заставаліся добрасумленнымі. Адказнасць, стараннасць – з гадамі толькі ўзмацняліся. Назапашваўся і вопыт.

Валерый мясцовы. Нарадзіўся ў Васілеўшчыне. Калі многія яго равеснікі ў пошуках найлепшай долі падаліся ў горад, ён нікуды не паехаў з малой радзімы. Вось і атрымалася: дзе нарадзіўся – там і згадзіўся.

Пасля службы ў арміі Валерый прыйшоў на работу ў тагачасны калгас

«Бальшавік». Цяпер гэта АСП «Вузлянка» УП «Мінскі Камароўскі рынак». Правы трактарыста набыў яшчэ падчас навучання ў школе ў Крывіцкім вучэбна-вытворчым камбінаце. І вось ужо 34 гады нязменна працуе ў гаспадарцы.

– Пра Валерыя Мечыслававіча можна гаварыць бясконца. Пра яго адказнасць, руплівасць, надзейнасць. Пра любоў да тэхнікі, зямлі-карміцелькі, – кажа галоўны эканаміст АСП «Вузлянка» Галіна Швайкоўская. – За гады працы ў гаспадарцы многія работы давялося дбайнаму механізатару выконваць: араць, сеяць, арганіку вывозіць, мінеральныя тукі ўносіць, кармы назапашваць, збажыну ўбіраць… Які участак яму ні даручы, не падвядзе: усё зробіць на выдатна.

У дзень майго прыезду ў гаспадарку Валерый Масевіч займаўся падкормкай азімых культур. Шукаць яго доўга не давялося. Працаваў непадалеку ад мехмайстэрні і прыехаў туды, каб заправіць свой агрэгат азотнымі тукамі.

– Жыву як усе, працую на зямлі. Люблю сваю работу, тэхніку. Гэта ўвогуле справа майго жыцця, – сцвярджае Валерый Масевіч. – А што датычыць работы, то яе ў сельскай гаспадарцы заўсёды хапае. Паспявай толькі ўпраўляцца. У апошнія гады вясной часцей усяго займаюся ўнясеннем мінеральных тукаў, хімпраполкай. Потым перасаджваюся на корманарыхтоўчы комплекс, таксама на збожжаўборачным камбайне працую… Біяграфія ў мяне звычайная. Няма асабліва пра што гаварыць. Ды і час ўжо вяртацца да справы: палетак чакае. Пакуль спрыяе надвор’е, трэба рабіць.

– Валерый Мечыслававіч – надзвычай дысцыплінаваны, адказны і старанны механізатар. І вельмі надзейны. За што б ні ўзяўся, выканае якасна. Бо найлепшы яго кантралёр – уласнае сумленне, – адзначае дырэктар АСП «Вузлянка » Юрый Гапановіч. – Увогуле на такіх, як ён, і трымаецца сельская гаспадарка. Не раз бачыў, што да яго і людзі цягнуцца. Звяртаюцца па параду, падказку. І ён нікому не адмаўляе, усім ідзе насустрач. Вопыту ж не займаць! У тэхніцы добра разбіраецца, па характары – добразычлівы, шчыры, гатовы ўсім дапамагчы.

У канторы даведалася, што Валерый Масевіч не раз заахвочваўся за сваё старанне – граматамі, прэміямі, каштоўнымі падарункамі. Напрыклад, у 2018 годзе быў узнагароджаны ганаровай граматай Міністэрства сельскай гаспадаркі, у 2022-м – ганаровай граматай дзяржаўнага аб’яднання «Сталічны гандаль і паслугі», якому падпарадкоўваецца УП «Мінскі Камароўскі рынак».

– Такія людзі, як Валерый Масевіч, для любога сельскагаспадарчага прадпрыемства – сапраўдная знаходка. У яго на першым месцы – работа. Ніколі не лічыцца з часам. Памятаю, адзін год Валерый Мечыслававіч з трох гадзін да шасці кармы рэзаў, а ўжо з васьмі да позняга вечара на камбайне працаваў. Вось такі ён у нас шчыры, старанны! – падкрэслівае Галіна Швайкоўская. – Збожжаўборачны камбайн КЗС-1218 у яго не новы. З 2010 года на ім працуе. Але пад прыглядам механізатара служыць надзейна. Мінулы год не даў важкіх намалотаў, але камбайнеры стараліся ўбраць збажыну своечасова. Затое зялёнай масы на кармы нарыхтаваў 763 тоны. На працягу светлавога дня на корманарыхтоўчым комплексе КГ-6 завіхаўся. Дзякуючы ў тым ліку і яго намаганням у нас было назапашана для жывёлы дастаткова кармоў.

Кожны дзень Валерый Масевіч спяшаецца на працу, якая прыносіць яму радасць і задавальненне. Дае стымул жыць і адчуваць сябе патрэбным – сваім блізкім, роднай гаспадарцы, дзяржаве.

Марыя ЛУБНЕЎСКАЯ

Фота аўтара