У панядзелак вечарам адбылася пашыраная абласная селектарная нарада, якую правёў губернатар Міншчыны Л. Ф. Крупец. Абмеркаваны пытанні па разгортванні шырокім фронтам вясенніх палявых работ, навядзенні парадку на зямлі, павышэнні прадуктыўнасці дойнага статка. У пачатку патрабавальнай размовы з кадрамі Леанід Фёдаравіч адзначыў, што ў гаспадаркі паступілі неабходныя фінансавыя сродкі, у тым ліку і з абласнога бюджэту, крэдытныя рэсурсы, аднак станоўчай вытворчай дынамікі ў многіх не назіраецца. Больш таго, Камітэтам дзяржкантролю выяўляюцца абуральныя факты, калі ў гаспадарках на многіх гектарах збожжавыя збіраюцца сеяць па збожжавых, нядбайна захоўваюць мінеральныя ўгнаенні, ядахімікаты.
Хвалюе і пачатак пасяўной, бо работы ў полі разгортваюцца марудна. Упускаюцца аптымальныя тэрміны падсеву шматгадовых траў, падкормкі азімых культур, вывазкі арганікі. На раніцу ў панядзелак па вобласці пасеялі 2,5 тысячы гектараў збожжавых. У сямі раёнах яшчэ не прыступалі да гэтай работы. А як сведчыць практыка, найлепшую аддачу дае якраз ранняя сяўба. Праводзіць яе неабходна зладжана, на працягу ўсяго светлавога дня, на высокім арганізацыйным узроўні, строга захоўваючы тэхніку бяспекі.
Больш падрабязна на стане спраў у аграпрамысловым комплексе спыніўся старшыня камітэта па сельскай гаспадарцы і харчаванні І. М. Шматко. У асобных раёнах назіраецца значная гібель пасеваў азімых рапсу, жыта. Зноў жа, гэта нярэдка даюць аб сабе ведаць дапушчаныя ў свой час тэхналагічныя парушэнні. Такія ўчасткі мэтазгодна перасеяць яравым рапсам, кукурузай. Цяпер вельмі важна неадкладна падкарміць тыя плошчы жыта, якія адводзяцца для выпасу дойнага статка, што дазволіць істотна паправіць справы з вытворчасцю малака. Нельга прамарудзіць і з сяўбой ранніх яравых, пасадкай бульбы, кукурузы. Дарэчы, у некаторых адчуваецца значны дэфіцыт насення «каралевы палёў». Так, у Крупскім раёне яго маецца ўсяго 19 працэнтаў ад неабходнага, малавата кукурузы і ў гаспадарках Вілейшчыны, Мядзельшчыны… Што датычыць «другога хлеба», то яго неабходна вырошчваць у спецыялізаваных кааператывах, дзе можна механізаваць усе працаёмкія аперацыі, атрымліваць высокія ўраджаі бульбы і значныя прыбыткі. Іван Міхайлавіч таксама запэўніў, што ў вобласці прыняты неабходныя меры, каб ніводная гаспадарка сёлета на пасяўной не адчувала недахопу ў паліве. У той жа час на месцах трэба паклапаціцца аб эфектыўным выкарыстанні энерганасычаных трактароў, камбінаваных агрэгатаў, якія і вызначаюць поспех на веснавым полі.
Сур’ёзная крытыка прагучала ў адрас тых рэгіёнаў, дзе не справіліся з прагнознымі паказчыкамі першага квартала па вытворчасці малака. Як адзначыў намеснік старшыні абласнога выканаўчага камітэта Васіль Міхайлавіч Казакевіч, у Мінскім раёне надой ад каровы знізіўся ў параўнанні з адпаведным перыядам мінулага года на 35 кілаграмаў, у Капыльскім — на 28, Пухавіцкім за сакавік — на 6 кілаграмаў… Безумоўна, з падобным становішчам ніхто мірыцца не будзе. Нямала дзе неапраўдана марудзяць з закупам маладняку буйной рагатай жывёлы ў насельніцтва. Ёсць у гэтым важным напрамку сур’ёзныя недапрацоўкі і на Мядзельшчыне.
Асаблівая ўвага ўдзельнікаў селектарнай нарады таксама звярталася на добраўпарадкаванне. І не толькі населеных пунктаў, але і тэрыторый прадпрыемстваў і арганізацый, абочын дарог, міні-палігонаў. У вобласці аб’яўлены месячнік па забеспячэнні парадку на зямлі, эфектыўным яе выкарыстанні. Прадоўжыцца ён да 1 мая і паспрыяе паўсюднаму навядзенню чысціні і прыгажосці.
Падагульняючы размову, Леанід Фёдаравіч падкрэсліў, што на Міншчыне ёсць усё неабходнае для правядзення пасяўной на дастойным узроўні. І найпершы клопат усіх, маючых дачыненне да адказнай кампаніі, годна справіцца з гэтай задачай. У тым ліку і кадраў Мядзельшчыны, на што коратка, але прадметна ўказаў адразу пасля селектарнай нарады старшыня райвыканкама Аляксандр Іванавіч Даніленка.
Павел ЖУКАЎ.