У КРАІНЕ робяцца пэўныя захады, накіраваныя на папярэджанне распаўсюджання каранавіруснай інфекцыі. Многія рэгіёны прынялі рашэнні аб увядзенні абавязковага масачнага рэжыму. У канцы мінулага тыдня такое рашэнне прынята і кіраўніцтвам сталічнай вобласці: з панядзелка на тэрыторыі Міншчыны ўведзены масачны рэжым.
— Барацьба за здароўе людзей у сітуацыі з пандэміяй каранавіруса — гэта не толькі задача медыкаў, — падкрэсліў старшыня раённага выканаўчага камітэта Анатолій Вайнілка ў сувязі з прынятым рашэннем. — У працэс трэба ўключыцца кожнаму. Нашы медустановы годна спраўляюцца з пастаўленымі задачамі, неабходных рэсурсаў хапае. Але і мы павінны адказна ставіцца да здароўя — як свайго, так і тых, хто побач, засцерагчыся, наколькі гэта магчыма, ад небяспечнай хваробы.
Анатолій Мар’янавіч патлумачыў, што штрафаваць за адсутнасць сродкаў індывідуальнай аховы ў грамадскіх месцах пакуль не будуць. Але адказнасць за адсутнасць масак у людзей панясуць кіраўнікі арганізацый, дзе было зафіксавана парушэнне.
У ахоўных масках людзі павінны знаходзіцца не толькі на сваіх працоўных месцах, але і ў магазінах, грамадскім транспарце, аб’ектах грамадскага харчавання (за выключэннем часу непасрэднага прыёму ежы). Не заходзьце без маскі ў аптэку, установу аховы здароўя, адміністрацыйныя будынкі, банкі, на пошту, ва ўстановы культуры і іншыя месцы, дзе немагчыма забяспечыць сацыяльнае дыстанцыяванне. Дарэчы, тут маюць права не абслугоўваць кліентаў, якія не выконваюць гэта правіла.
Каб прадухіліць распаўсюджанне каранавіруснай інфекцыі, у вобласці абмежавалі правядзенне спартыўных мерапрыемстваў, культурных, навуковых, рэлігійных і іншых масавых. Сітуацыя па захворванні COVID-19, а таксама іншымі рэспіраторнымі захворваннямі штодзень маніторыцца і аналізуецца.
Масачны рэжым будзе дзейнічаць да стабілізацыі эпідэмічнай абстаноўкі.
Іна Ярчак.
Фота БЕЛТА.