Частку першую чытайце тут
Прыбавілася жыццёвых турбот у паэта з намерам разам з вядомымі літаратарамі Беларусі Міхасём Лыньковым і Аркадзем Куляшовым займець на беразе Нарачы дачы. Участак пад іх пісьменнікі, дарэчы, усе яны з часам сталі народнымі, выбралі ў 1954 годзе. Месца цудоўнае: проста на беразе Нарачы, з аднаго боку санаторый, з другога — рэстаран. Не будзем забываць, што да Купы тады пралягала чыгунка, вузлавая станцыя знаходзілася ў Лынтупах. Цягнічок адсюль ішоў праз Кабыльнік, Канстанцінава, Альшэва. Вузкакалейка дазваляла проста адсюль без праблем дабірацца ў Вільню… Дамы вырашылі ўзводзіць з часанага бярвення, а сцены звонку абшыць шалёўкай і пафарбаваць у розны колер. У Лынькова дача атрымалася чырвоная, у Танка — сіняя, у Куляшова — зялёная, які пазней у адным са сваіх вершаў напісаў:
Прывітанне, Купа!
Купа дарагая!
Звонкая “кукушка”-
паравоз!..
Дом Яўгену Іванавічу ўзвяла арцель Віктара Лапціка, ён жа з часам пры неабходнасці праводзіў і рамонтныя работы. Пасля завяршэння будаўніцтва слынным літаратарам прыемна было пасядзець і пагутарыць у садзе каля вогнішча ці проста на беразе Нарачы пад спеў блакітных хваль. Нярэдка ўлетку тут адбываліся цёплыя сустрэчы з вучнямі альбо пісьменнікі самі накіроўваліся ў той жа піянерлагер “Зубраня” ці розныя школы. Ёсць у тым садзе і дрэўцы са знакамітага калгаса “Світанак” з-пад Бабруйска, якім пасля вызвалення Беларусі ад нямецка-фашысцкіх захопнікаў шмат год талкова кіраваў на сваёй радзіме ў вёсцы Мышкавічы Герой Савецкага Саюза і Герой Сацыялістычнай Працы Кірыл Арлоўскі. У дзённіках Максіма Танка ёсць з гэтай нагоды такія радкі: “Памёр Кірыл Арлоўскі. Недзе на Нарачы ў нас і ў Лыньковых растуць чатыры яго яблынькі, якія ён падарыў позняй восенню 1966 года. Усю зіму яны праляжалі ў нас у гаражы, а вясною мы іх пасадзілі. Не думаў, што яны прыжывуцца…”
Калі не ўтойваць, то здараліся і прыкрыя непрыемнасці. Позняй восенню, зімой, ранняй вясной дачы пуставалі. А ў наваколлі хадзілі чуткі, што ўсялякага дабра там нямерана! Даходзіла такая пагалоска і да вушэй падлеткаў. Пра ўсіх не скажу, бо дакладна не ведаю, але аднойчы на дачы Максіма Танка “пагаспадарылі” два вучні сярэдняй школы з вёскі Нарач. Перапалох пасля ўзняўся вялікі. Тагачасных загадчыка рана і дырэктара школы выклікалі для тлумачэнняў нават у Міністэрства адукацыі. Маўляў, вы што, пісьменнікаў не шануеце?! Мяне ж больш цікавіла рэакцыя на гэту падзею самога Максіма Танка. Наколькі чуў, да яго са школы наведваліся два педагогі, прасілі прабачэння за сваіх выхаванцаў. І зусім нязмушана паміж настаўніцамі і творцам завязалася цікавая гутарка. Не столькі пра нядобры ўчынак падлеткаў (на гэта Максім Танк на дзіва адрэагаваў спакойна), колькі пра агульных знаёмых, цудоўныя краявіды, на якія вельмі багатая Мядзельшчына. Канечне ж, у душы Яўген Іванавіч быў не ў захапленні ад таго, што падлеткі залезлі на яго дачу. Аднак на справе ўсё павярнулася мірным сыходам. У школу настаўніцы вярталіся прасветленыя і суспакоеныя. Вось што значыць сустрэцца з геніяльным чалавекам, які добра ведае і ацэньвае жыццё! Пазней мяне адна з педагогаў у нязмушанай гутарцы запэўнівала, што нічога з рэчаў падлеткі тады з дачы не ўзялі, толькі адзін прыхапіў з веранды кніжку “Казкі народаў Поўначы”. Яна не выключала, што пад маркай школьнікаў на дачы мог пабываць хтосьці з дарослых. Ускосным пацвярджэннем гэтага можа быць і тое, што блізка да таго часу з дачы Аркадзя Куляшова прапала бурка, якую народнаму паэту падарыў Расул Гамзатаў, нейкія рэчы…
Пра надзвычайную таварыскасць, сардэчную дабрыню, прастату ў адносінах вялікага паэта з людзьмі і пачынаючымі творцамі мне даводзілася чуць ад многіх. Найбольш запомніўся пра гэта невялічкі аповед вядомага ў краіне паэта Генадзя Пашкова пра выпадковую сустрэчу з Максімам Танкам. “Было гэта восенню 1974 года, — пачынае Генадзь Пятровіч. — Якраз тады на сакратарыяце Саюза пісьменнікаў у Маскве разглядалася пытанне аб рабоце з маладымі літаратарамі ў Беларусі. Канечне, паехалі туды прадстаўнікі ад кіраўніцтва рэспубліканскай пісьменніцкай арганізацыі, узялі з сабой і некалькі пачаткоўцаў ад літаратуры — паэтэсу Яўгенію Янішчыц, празаіка Алеся Жука і мяне. Пасялілі ўсіх у гатэлі «Масква», на сакратарыяце пісьменніцкая арганізацыя Беларусі атрымала высокую ацэнку. Пасля гэтага мы ўтраіх накіраваліся знаёміцца з маскоўскімі плошчамі, праспектамі, крамамі. Пры вяртанні ў вестыбюлі гасцініцы сутыкнуліся з Максімам Танкам. Ад такой неспадзяванкі нават разгубіліся. Яўген Іванавіч пазнаў землякоў і з прыязнай усмешкай на твары заўважыў: «Як добра, што сустрэліся! Запрашаю вас у рэстаран “Зімовы сад”, гэта пры гасцініцы, будзем адзначаць маю ўзнагароду».
Аказваецца, Максіму Танку, які прыехаў у Маскву асобна па выкліку Прэзідыума Вярхоўнага Савета СССР, толькі што ўручылі Залатую зорку Героя Сацыялістычнай Працы. «Мы быццам трапілі ў казку, —шчыра дзеліцца Генадзь Пашкоў. — Жылі ў адной гасцініцы з такім вялікім чалавекам, сядзелі разам за адным сталом з Максімам Танкам, частаваліся. Тое шчаслівае ўзрушэнне памятаецца і сёння. А калі з рэстарана падымаліся па лесвіцы ў нумары, а парэнчы там і на самай справе зусім невысокія, Яўген Іванавіч паказаў месца, адкуль пайшоў у вечнасць у чэрвені 1942 года Янка Купала… Дзякуй Богу, — заключыўГенадзьПятровіч, — што на беларускайзямлінараджаюццатакія сыны, якіяслужаць для нас духоўным арыенцірам!»
Што яшчэ цікава, Яўген Іванавіч і на высокіх пасадах не саромеўся сваёй прастаты. Той, хто быў добра знаёмы з ім, ведаў, як Максім Танк любіў малако. Аднойчы на базары паэт падышоў да адной кабеты і паміж імі адбыўся прыблізна такі дыялог:
— Хачу купіць малака, па ўсёй бачнасці, яно ў вас добрае.
— Відаць, вясковы чалавек, калі разбіраецеся. А малако ў мяне і сапраўды смачнае, з кароўкай пашанцавала. А куды вам наліць?
— Ды няма ў мяне з сабою ніякага посуду, куплю са слоікам.
— Не, сынок, у нас з банкамі кепска, яе не прадам.
— А, ну і не трэба, — з гэтымі словамі Яўген Іванавіч узяў трохлітровы слоік у абедзве рукі, выпіў і пайшоў далей…
Творца ўсё жыццё стараўся не згубіць здольнасць па-новаму глядзець на ўсё, што робіцца на свеце. Максім Танк добра ведаў, як лёгка прывыкаюць ногі да старых ботаў, вочы — да вобразаў, вушы — да песень. Тады чалавек пачынае старэць, не разумець тых змен, якія адбываюцца вакол яго. Народнаму ж паэту ўдавалася не адставаць ад часу. У прыватнасці, ён лічыў, што калі дэмакратыя ўскладняе наша жыццё, калі людзі пакутуюць ад непаладкаў у краіне, калі западае навука, культура і іх асноўная база — эканоміка, то “ніякая гэта не дэмакратыя”.
Так ужо распарадзіўся лёс, што з восені 1994 года адлічваліся апошнія месяцы жыцця Яўгена Іванавіча. Якраз тады землякі ініцыявалі правядзенне сустрэчы. Вось што напісаў ён у дзённіку напрыканцы верасня: «Наведалі мяне мае мядзяльчане. У кастрычніку (28-га) прасілі прыехаць на літаратурны вечар разам з Захарэвіч Марыяй Георгіеўнай і Вячаславам Пятровічам Рагойшам. Прывезлі з радзімы маёй прыгожы букет кветак і мядзельскіх яблыкаў. Відаць, калі змагу, пад’еду, хоць дактары і забаранілі ні на якія вечары, выступленні не ездзіць аднаму і не выходзіць з дому… Званілі з Мядзела, што 28-га прыедуць за намі — удзельнікамі літаратурна-музычнай вечарыны. Не ведаю, ці вытрымаю гэту нагрузку, бо з кожным днём адчуваю сябе горш. Толькі не гавару пра гэта нікому…» І ўсё ж памятная сустрэча адбылася ў перапоўненай канцэртнай зале тагачаснай музычнай школы, людзі стаялі ў праходах. Адчувалася: знакамітага земляка тут чакалі з нецярпеннем. У апошнія гады Максім Танк нячаста наведваўся на радзіму — не дазваляла здароўе. Яно і раней падводзіла. Аб гэтым можам меркаваць і па запісе ў дзённіку, зробленым нашмат раней, яшчэ ў 1966 годзе: «Сёння ў Кабыльніку памёр у бальніцы дзядзька Фадзей. Не стала нашага пількаўскага Калумба, працавітага аратага, цудадзейнага ветэрынара, вопытнага партызанскага разведчыка і першага старшыні калгаса. А мяне зноў зваліла хвароба, і я не змагу паехаць, каб з ім развітацца. Без яго і бацькам зараз будзе цяжэй. Як вулей, у якім нарушаны спрадвечны лад, асірацеў і наш хутар».
На літаратурна-музычнай вечарыне шматлікіх прысутных найбольш уразілі новыя вершы Яўгена Іванавіча з апошняга зборніка «Мой каўчэг», якія ён прачытаў са сцэны, а потым добразычліва адказаў на пытанні, што паступілі з залы. Удалым дапаўненнем сюды з’явілася і выступленне фальклорнага жаночага калектыву са Сватак. Цудоўная сустрэча з зямлякамі да глыбіні душы ўсхвалявала Максіма Танка: «Дзякуй Богу, — казаў ён, — што мы ўбачыліся! Мне выпала шчасце яшчэ раз пабываць на роднай Мядзельшчыне…» Творчы вечар у многім атрымаўся яшчэ і таму, што да яго грунтоўна падрыхтаваліся самадзейныя артысты азёрнага краю — з раённага Дома культуры, музычнай школы, фальклорна-этнаграфічнага гурта «Вузлянка». І толькі назіральныя людзі прыкмецілі, што даецца сустрэча з землякамі Максіму Танку зусім няпроста. Наконт гэтага можна было меркаваць хаця б па тым, што ўрач, які прыехаў з Яўгенам Іванавічам, не-не ды і перадаваў яму неўпрыкмет нейкія лекі. А ў дзённіку пра памятную сустрэчу вялікі паэт пакінуў такі запіс: «Позняй ноччу прыехаў з Мядзельшчыны з т. зв. літаратурна-песеннай вечарыны, прысвечанай мне, грэшнаму. Перш заехалі ў Пількаўшчыну, дзе надзвычай гасцінна сустрэлі ўсю нашу васьміасабовую каманду Федзя і Маня, пачаставаўшы нас сваімі вясковымі прысмакамі. А потым — у Мядзела. І хоць я вельмі слаба сябе адчуваў, дзякуючы апецы Пятра Маркавіча сяк-так дацягнуў да канца. Мясцовыя кіраўнікі і работнікі культуры, трэба сказаць, наладзілі былі каралеўскі прыём і стол. Мяркуючы па стане свайго здароўя, гэта было маё развітанне з Нараччу і маімі сябрамі. Па дарозе спыніліся і на слабадскім могільніку. Пакланіўся магілам сваіх бацькоў і дзядоў, суседзям: “Да хуткай сустрэчы, дарагія!”, бо я ў апошнім завяшчанні буду прасіць пахаваць на гэтым каля вас пагорку, усеяным заімшэлымі валунамі, і мяне з Любашай, так як і яна мае “права” быць тут пахаванай, бо бацька родам з гэтай жа Слабады. Добра, што дзень выдаўся сонечны, пагожы. Толькі калі вярталіся ў Мінск, пачаў імгліць дождж.
Падарылі мне там керамічны кубак з мёдам, восеньскі пейзаж работы мясцовага мастака і цудоўны драўляны бачонак ад Сваткаўскай школы, ну і — прыгожыя букеты кветак з караваем. А ў брата Федзі папоўніў запасы бульбай, грыбамі, цыбуляй, буракамі. Адным словам, вярнуўся, як наш даваенны поп пасля аб’езду веруючых сваёй парахвіі…»
У першы дзень жніўня наступнага года Максім Танк напіша кранальныя радкі, якія нагадваюць развітальны погалас жураўлінага кліна, што адлятае за небакрай:
Вецер несціхаючы шалее,
каардынаты вам перадаю,
што ля мыса
Добрая Надзея
песню я апошнюю пяю.
На сёмы дзень гэтага месяца выдатнага паэта не стала. Праводзіць яго ў апошні шлях у Пількаўшчыну прыехалі віцэ-прэм’ер рэспублікі Уладзімір Русакевіч, міністр культуры і друку Анатоль Бутэвіч, пісьменнікі, паэты, работнікі культуры і навукі, землякі, жыхары навакольных вёсак. Перад гэтым прайшла грамадзянская паніхіда ў сталіцы ў Доме літаратара. Апошні паклон Паэту аддалі Прэзідэнт Рэспублікі Беларусь Аляксандр Лукашэнка, прэм’ер-міністр Міхаіл Чыгір, міністры, члены ўрада, Адміністрацыя Прэзідэнта, беларуская інтэлігенцыя. На жалобным мітынгу тагачасны старшыня райвыканкама Іосіф Тарасёнак зрабіў акцэнт на тым, што Максім Танк заўсёды заставаўся адным з нямногіх, чыя творчасць і асабістая энергія абаранялі годнасць беларускай літаратуры. Усё свядомае жыццё народны паэт прысвяціў служэнню роднай Беларусі, быў чулым да клопатаў простых людзей. Таму памяць аб Максіме Танку, любімым земляку, назаўсёды застанецца ў нашых сэрцах і памяці нашчадкаў. Яно і сапраўды, да гэтага чалавека заўсёды цягнуліся людзі, бо ад яго сыходзіла цяпло. І кожны мог знайсці разуменне і падтрымку.
Трапна заўважыў у развітальнай прамове на могілках у Новіках і старшыня мясцовай аграфірмы «Зара» Пётр Чарняўскі наконт таго, што цяжка і падлічыць, колькі разоў за многія гады звярталіся людзі да Яўгена Іванавіча з рознымі пытаннямі. І нікому ён не адмовіў у дапамозе, не пакінуў сам-насам у бядзе… І такая дэталь: жонка Максіма Танка Любоў Андрэеўна памерла раней, яшчэ ў сакавіку. Яе урну з прахам паэт захоўваў дома і выказаў пажаданне, каб іх пахавалі разам. Волю народнага песняра выканалі. А наша зямлячка Тамара Кручэнка на наступны дзень напісала і прынесла ў рэдакцыю газеты «Нарачанская зара» верш, дзе ёсць і такія радкі:
Прыйшла ў край наш
горкая навіна:
«Не стала Танка,
песняра Максіма…»
У Новіках, на ўзгорку…
Тры бярозы…
Дзядзькі сівыя
не хаваюць слёзы.
«Абраў сабе тут месца,
наш Максім…
Ён быў сапраўдны
Беларусі сын…»
Паэт вярнуўся
да матулі Домны.
Ён — дома…
Нямала год мы заставаліся ў даўгу перад вялікім Песняром, які надзвычай шчыра прастаўляў на ўвесь белы свет Мядзельшчыну, цудоўнае возера Нарач. Праслаўляў пераканаўча і таленавіта. Работа па ўвекавечванні яго памяці выйшла на годны ўзровень толькі ў 2014 годзе з адкрыццём каля Дома культуры ў Мядзеле першага ў краіне помніка Максіму Танку. Побач з бронзавай фігурай устаноўлены буйны валун з выявай разгорнутай кнігі. А на яе старонках выбіты радкі з верша паэта: «Ёсць адна песня песняў — Пра Радзіму», над якімі застыла ў палёце нарачанская чайка.
Па маім меркаванні, каб лепш усвядоміць, якую багатую скарбонку шэдэўраў пакінуў нам Максім Танк, трэба больш чытаць яго твораў, часцей звяртацца да іх у штодзённым жыцці. І тады перад намі ва ўсёй велічы і прыгажосці паўстане Волат паэтычнага свету міжнароднага маштабу. Ды яшчэ, апрача стварэння яму сапраўднага музея, някепска было б паклапаціцца, каб усе вуліцы, у тым ліку і ў аграгарадку Сваткі, якія носяць імя народнага паэта, вабілі дагледжанасцю і прыгажосцю. «Бо мы, мядзельцы, — адзначыў пры адкрыцці помніка Максіму Танку народны мастак Беларусі Васіль Шаранговіч, — павінны ганарыцца нашай зямлёй, якая нарадзіла такога паэтычнага волата! Геніяльны зямляк мне заўсёды ўяўляўся многавяковай велічнай нарачанскай сасной, сапраўдным чалавекам: працавітым, шчырым, добрым, які любіў не столькі сябе, колькі іншых людзей. Трэба не толькі памятаць пра волата беларускай літаратуры, але і самім старацца ўздымацца да вышынь той чалавечнасці, якую меў Максім Танк». Сказана ад душы, трапна, і па сутнасці справы раскрывае сакрэт велічнасці гэтага нашага земляка, нашага Народнага Паэта, творчасць якога яшчэ пры жыцці стала класікай. І ў многім таму, што самыя светлыя, самыя лепшыя вершы Яўген Іванавіч знаходзіў на роднай зямлі…
***
З нагоды 110-годдзя з дня нараджэння нашага земляка, народнага паэта Беларусі Максіма Танка праводзім апытанне:
«Максім Танк — мой зямляк. Узгадваючы Максіма Танка, узгадваю…»
Выбярыце адзін ці некалькі варыянтаў (максімум — чатыры) ці дабаўце свой.
Хочаце адказаць творча? Свой варыянт адказу з фота ці відэа можаце дасылаць на адрас narazara111@gmail.com ці пакідаць у каментарыях пад гэтай інфармацыяй у сацсетках і тэлеграм-канале «Нарачанскай зары».
- Пількаўшчыну* 31%, 10 голосов10 голосов 31%10 голосов - 31% из всех голосов
- Помнік 25%, 8 голосов8 голосов 25%8 голосов - 25% из всех голосов
- Твор 25%, 8 голосов8 голосов 25%8 голосов - 25% из всех голосов
- Фотапартрэт 19%, 6 голосов6 голосов 19%6 голосов - 19% из всех голосов
- Падручнік 0%, 0 голосов0 голосов0 голосов - 0% из всех голосов
- Назву вуліцы 0%, 0 голосов0 голосов0 голосов - 0% из всех голосов
- Музей 0%, 0 голосов0 голосов0 голосов - 0% из всех голосов