Анатолій Ісачанка і Таццяна Апраніч завіталі з падарункам на ўрачыстую лінейку ў Нарацкую сярэднюю школу №2 (фота)

У Дзень ведаў Нарацкую сярэднюю школу №2 наведалі намеснік старшыні Савета Рэспублікі Нацыянальнага сходу Рэспублікі Беларусь Анатолій Ісачанка і начальнік галоўнага ўпраўлення па адукацыі Мінскага абласнога выканаўчага камітэта Таццяна Апраніч.

На ўрачыстай лінейцы, прысвечанай пачатку новага навучальнага года, Анатолій Ісачанка павіншаваў прысутных — вучняў, настаўнікоў, бацькоў — з Днём ведаў. Пажадаў усяго самага добрага, каб задуманае здзейснілася. Каб увайшлі ў Краіну ведаў з прыўзнятым настроем. І, вядома, каб новы навучальны год быў значна лепшы, чым папярэдні. Разам з тым, Анатолій Міхайлавіч зазначыў, што школа — не месца для палітычных баталій. Гэта ўстанова — дзе дзеці атрымліваюць адукацыю, вучацца дабрыні, любові — да бацькоў, сяброў, радзімы, сваіх каранёў. Гэта патрэбна памятаць.

Акрамя таго, Анатолій Ісачанка уручыў школе шыкоўны падарунак — сертыфікат на набыццё скаладрома.

З цікавасцю шаноўныя госці здзейснілі экскурсію па школе. Пабывалі ў класах, дзе першы ўрок быў прысвечаны тэме: “Я вырас тут, і край мне гэты дарагі”. Прайшліся па ўтульных калідорах, кабінетах, пазнаёміліся са створаным ва ўстанове музеем. Шаноўныя госці пакінулі таксама свае водгукі ў Кнізе ганаровых гасцей.

Марыя Лубнеўская.